Самарқанд, Жиззах ва тошкентлик 3 нафар талаба Исроил-Фаластин урушига кетаётган вақтда қўлга олинди
Самарқандлик 3 нафар талаба Исроил-Фаластин урушига қатнашиш мақсадида Туркия орқали Сурияга чиқиб кетмоқчи бўлди. Бу ҳақда Замон дастурида хабар берилди.
Маълум қилинишича, талабалар ҳижрат, жиҳод каби тушунчалар ортидан Исроил-Фаластин урушига қатнашмоқчи бўлишган.
«Исроил-Фаластин уруши бошланди. Мусулмонларнинг қирғин бўлаётганини кўриб, кўнгилбўшлик қилдим. Баъзи домлаларнинг фитналарига учиб, Сурия давлати орқали Фаластинга чиқиб кетмоқчи бўлдим», — дейди йигитлардан бири.
Йигитлар Каттақўрғон, Жиззах ва Тошкент вилоятидан эканлиги аниқланган. Улар Миллий университетнинг Физика факултетида ўқиган.
«Ўзимиз қизиқиб юрардик. Асосий сабаблардан бири Исроил-Фаластин уруши бўлди. Ўз тақдиримга болта уриб қўйдим», — дейди йигитлардан яна бири.
Йигитлар Туркия ҳуқуқни муҳофаза қилувчи органлар томонидан қўлга олиниб, Ўзбекистонга депортатция қилинган.
Аниқланишича улар ижтимоий тармоқларда таъқиқланган видеоларни кўриб, террорчилик ташкилотининг ғоявий рахномаларининг маърузаларини тинглаган.
Самарқандлик йигитнинг онаси ўғлининг бу ишига муносабат билдирди:
«Ўғлим охирги пайтларда уруш ҳақида тез-тез гап очишни бошлаганди. Қандайдир хомуш бўлиб қолган эди. У фақат Фаластин уруши ҳақида гапирар эди. Бу нарсаларни оддий айтиб беряпти деб ўйлаганман»,
— дейди йигитнинг онаси.
Йигитлар судда айбини тан олган. Суд томонидан Жиноят кодексининг тегишли моддалари билан йигитларнинг бирига 2 йил, бирига 5 йил олти ой ва яна бирига 6 йилга қамоқ жазоси тайинланди.
