Марадонадан солиқ тўлашдан бўйин товлаганлик айби олиб ташланди
Италиянинг Рим шаҳри кассация суди аргентиналик футболчи Диего Марадонадан солиқ тўлашдан бўйин товлаганлик айбловини олиб ташлади. Бу ҳақда марҳум футболчининг адвокати Анжело Пизани Reuters агентлигига хабар берди.
«Ҳаммаси тугади ва мен аниқ айтишим мумкинки, Марадона ҳеч қачон солиқ тўлашдан бўйин товламаган», деди адвокат.
Унинг сўзларига кўра, бу қарор футболчи дуч келган 30 йиллик таъқибларга якун ясаган ва энди Марадонанинг меросхўрлари етказилган маънавий зарар учун товон пули талаб қилиши мумкин.
Диего Марадона устидан тергов 1990-йилларда бошланган. Футболчи 1985 йилдан 1990 йилгача «Наполи» клубидан даромад олишда Лихтенштейндаги компаниялардан фойдаланганликда айбланган. Унга айблов қўйилиб, 37 миллион евро тўлашга ҳукм қилинган. Шунингдек, баъзи шахсий буюмлари мусодара қилинган.
Аргентиналик футболчи бир муддат Италияга қайтиб кела олмади, чунки ҳибсга олиниш таҳдиди бор эди. 2021 йилда суд солиқ тўлашдан бўйин товлаш иши бўйича ҳеч қандай далил йўқ деган қарорга келди.
