Коронавируснинг пайдо бўлишини тахмин қилган шифокор уни камайтириш йўлини маълум қилди

Кучли пандемия ҳақида огоҳлантирган америкалик эпидемиолог Ларри Бриллиант “Wired” журналига COVID-19 касаллигини қандай камайтириш ҳақида гапириб берди.

Маълум бўлишича, чечак, грипп, полиомиелитни йўқ қилиш пайтида тўпланган тажрибадан фойдаланган ва хавф ҳақида дунё ҳамжамиятини огоҳлантирмоқчи бўлган шифокор 2006 йилда келажакда инсониятни мисли кўрилмаган глобал эпидемия кутаётганини таъкидлаган.

"Миллиардлаб инсонлар касалланади. Тахминан 165 миллион одам нобуд бўлади. Дунё миқёсидаги таназзул рўй беради. Бирданига уч триллион долларгача иқтисодиётимизга етадиган зарар ҳамма учун юз миллион ўлимдан кўра оғирроқ бўлади", - деган эди шифокор.

“Wired” журнали мухбирлари эпидемиолог билан яна бир бор суҳбатлашиб, янги коронавируснинг ҳозирги пандемияси қачон тўхташини билишга ҳаракат қилишди.

Бриллиантнинг таъкидлашича, бутун эпидемиологик ҳамжамият узоқ вақт давомида кенг кўламли пандемия келиши ҳақида гапиришган ва билишган. Аммо муаммо унинг қачон бошланишида бўлган.

Шифокорнинг сўзларига кўра, одамларнинг ушбу хасталикка ҳали иммунитети йўқлиги боис коронавирус "бутун ҳаётимиздаги энг хавфли пандемия" бўлади.

"Бу эса ўз навбатида, коронавирус 7,8 миллиард аҳолининг вирусни юқтиришига олиб келади", дея таъкидлаган шифокор бутун дунё бўйлаб расмийлар томонидан одамларнинг ҳаракатини чеклаш, карантин чораларини кўриш каби қилинаётган кенг кўламли ишлари айни муддао бўлаётганлигини қўшимча қилди.

Шифокорнинг қайд этишича, бундай чоралар олимларга янги коронавирусга қарши вакцина яратишга вақт беради.

Эпидемиолог аҳолининг кенг қамровли текширув ва назорат остига олиниши қанчалар муҳимлигига эътибор қаратди ва "Бундай пайтда синовлар сезиларли роль ўйнаши мумкин. Чунки айни шу жараён вируснинг, аслида, қаердан пайдо бўлганлигини тушунишга кўмаклашади", дея ўз фикрини баён қилди.

Ва ниҳоят, шифокорнинг алоҳида қайд этишича, вирусни енгиш учун, авваламбор, одамлар унинг тарқалиш даражасини ва хавфини тушунишлари лозим.

Кейин эса албатта, вакцина ишлаб чиқилиши ҳамда шу йўл билан инсонларда вирусга қарши иммунитет ҳосил қилиниши керак экан.