Фарғонада ИИБнинг собиқ ходими жиноят устида қўлга олинди
Жорий йилнинг 28 апрель куни Фарғона вилоятида олинган хабарга кўра вилоят ИИБ ва Миллий гвардия ҳамкорлигида тезкор тадбир ўтказилди.
Тадбир давомида “Қўқон-Янгиқўрғон” автомобиль йўналишида киракашлик билан шуғулланиш ниятида бўлган Учкўприк туманида яшовчи фуқаро М.В. га шу туманда яшовчи “Илҳом” исмли шахс “Қўқон-Янгиқўрғон” йўналишида “Дарё транс” МЧЖ ва ЙҲХБ ходимлари томонидан ҳеч қандай тўсиқларсиз киракашлик қилиши учун шароит яратиб берилишини, ЙҲХБда ишловчи танишлари орқали барча ишларни ҳал қилишини айтиб, ушбу йўналишда киракашлик қилиш учун, олдиндан 600.000 сўм кейин эса ҳар ойда 300.000 сўмдан пул бериб келиши талаб қилингани аниқланган.
Тезкор тадбир давомида олдиндан белгиланган Учкўприк туман марказида “Илҳом” исмли шахс ўзининг бошқарувида бўлган “Спарк” русумли 40 787 ОАА давлат белгили автомашинасида аризачидан, махсус ишлов берилган 500.000 сўм пулни олган вақтда холислар иштирокида қўлга олинди.
Олиб борилган дастлабки ўрганишлар мобайнида “Илҳом” исмли шахс муқаддам Фарғона вилояти ИИБ тизимида хизмат қилиб, ўзининг салбий хатти-ҳаракатлари учун 2006 йилда ИИО сафидан бўшатилган 1978 йилда туғилган Учкўприк туманда яшовчи фуқаро И.И. эканлиги маълум бўлган.
Ҳозирда мазкур ҳолат юзасидан вилоят ИИБ томонидан суриштирув ишлари давом этмоқда.
