Бугун Тошкентда Ҳарбий суд биносининг тантанали очилиш маросими бўлиб ўтди
Бугун Тошкент шаҳрининг Юнусобод туманида қад ростлаган Ўзбекистон Республикаси Ҳарбий суд биносининг тантанали очилиш маросими бўлиб ўтди.
Тадбирда Олий суд раиси Б. Исломов, Миллий гвардия қўмондони Р. Джураев, Мудофаа вазирлиги ва Ҳарбий прокуратура вакиллари, судья ва адвокатлар, суд фахрийлари иштирок этди.
Очилиш маросимида сўзга чиққанлар суд-ҳуқуқ тизимини янада ислоҳ қилиш ва қонун устуворлигини таъминлаш мамлакатимизда амалга оширилаётган ислоҳотларнинг устувор йўналишларидан бири сифатида белгиланганлигини таъкидладилар.
Қайд этилганидек, суд-ҳуқуқ ислоҳотлари жараёнларида судьялар ва суд аппарати ходимларининг мавқеини, моддий рағбатлантириш ва ижтимоий таъминот даражасини ошириш, судларнинг моддий-техника базасини мустаҳкамлашга алоҳида эътибор қаратилмоқда.
Шунингдек, Президент томонидан судларнинг чинакам мустақиллигини таъминлаш, судларга ташриф буюрувчи фуқаролар ҳамда суд процессларининг барча иштирокчилари учун замонавий, ҳар томонлама қулай шароитлар яратиш масалаларига эътибор кучайтирилиши натижасида судларнинг моддий-техника базаси яхшиланди.
2021-2025 йилларда марказлаштириладиган маблағлар ҳисобидан молиялаштириладиган судларнинг бинолари ва хоналарини қуриш ҳамда реконструкция қилиш дастури асосида 2025 йилга қадар 32 та янги бино қуриш ҳамда 107 та бинони реконструкция қилиш ишлари назарда тутилган.
Сўнгги йилларда ушбу дастурга мувофиқ 46 та янги суд биноси қурилди, шунингдек 23 та суд жойлашган 17 та мавжуд маъмурий бинода реконструкция ишлари амалга оширилди. Натижада жами 101 та суд замонавий бинолар билан таъминланди.
Ҳарбий суднинг замонавий, барча шароитлар яратилган янги суд биноси ҳам Президентимиз бошчилигида олиб борилаётган катта бунёдкорлик ишларининг бир қисми ҳисобланиб, бино энг замонавий ахборот-коммуникация воситалари билан жиҳозланди.
Тадбирда бино қурилишида жонбозлик кўрсатган қурувчиларга эсдалик совғалари топширилди.
Сўнгра тантанали очилиш маросимининг рамзий тасмалари кесилиб, ташриф буюрган меҳмонлар суд биносида яратилган шароитлар билан танишдилар.
