«O‘zbekgidroenergo» AJ Markaziy Osiyodagi eng yuqori ESG reytingga ega «Pure-Player» kompaniya sifatida e’tirof etildi

Jahonda nufuzli hisoblangan Sustainable Fitch (London) xalqaro reyting agentligi «O‘zbekgidroenergo» aksiyadorlik jamiyatini «Pure-Player» – ya’ni faoliyati to‘liq ekologikaga ijobiy ta’sir ko‘rsatuvchi kompaniya («sof ishtirokchi») sifatida e’tirof etdi.

Shu bilan birga, agentlik Jamiyatning ESG reytingini “2” darajada tasdiqladi hamda kompaniyaning umumiy natijasini 72 dan 79 ballga oshirdi.

Mazkur natija kompaniyaning iqlim o‘zgarishini yumshatishga qo‘shgan ulkan hissasi, hamda 2024 yilda ishlab chiqilgan yangi «Iqlim strategiyasi – 2050» orqali uglerod chiqindilarini (issiqxona gazlari) qisqartirish bo‘yicha aniq maqsadlar belgilaganini aks ettiradi.

Shuningdek, Sustainable Fitch tomonidan ta’kidlanishicha, «O‘zbekgidroenergo» AJ bugungi kunda Markaziy Osiyodagi eng yuqori ESG reytingga ega kompaniya sifatida tan olindi.

Ma’lumot uchun:

Sustainable Fitch – xalqaro moliya bozori ishtirokchilari uchun kompaniyalarning ekologik, ijtimoiy va boshqaruv (ESG) samaradorligini baholovchi reyting agentligi hisoblanadi. ESG reytinglar 1 dan 5 gacha bo‘lgan shkalada beriladi, «1» – eng yuqori, «5» – eng past daraja. Shuningdek, kompaniyalarga 0 dan 100 gacha bo‘lgan umumiy ball beriladi – «0» eng past, «100» eng yuqori ko‘rsatkich sifatida baholanadi.

2024 yil bo‘yicha Jamiyatning ESG natijalari bilan tanishing:

Atrof-muhit bo‘yicha natijalar

«O‘zbekgidroenergo» AJ mamlakatning asosiy gidroenergetika ishlab chiqaruvchisi sifatida 75 ta gidroelektr stansiya va bitta shamol elektr stansiyasini boshqaradi.

Jami o‘rnatilgan quvvat — 2 256 MVt (2024 yil yakuniga ko‘ra).

Jamiyat 2050 yilgacha mo‘ljallangan Iqlim strategiyasini qabul qildi, unda Scope 1 va Scope 2 turkumidagi chiqindilarni 2028 yilga qadar 20 foizga qisqartirish maqsad qilingan. Bu strategiya O‘zbekistonda birinchi bo‘lib ishlab chiqilgan uzoq muddatli dekarbonizasiya dasturi hisoblanadi.

Ijtimoiy yo‘nalishdagi natijalar

Kompaniyada inson huquqlarini himoya qilish hamda diskriminasiya va ta’qiblarga qarshi siyosat joriy etilgan. Xodimlar qo‘nimsizligi past darajada saqlanib qolmoqda, bu esa barqaror kadrlar siyosati va sog‘lom mehnat muhitining yaqqol ifodasidir.

Korporativ boshqaruv

«O‘zbekgidroenergo» AJda ikki bosqichli boshqaruv tizimi, samarali risk-menejment bo‘limi va ISO xalqaro standartlari joriy etilgan. Hisobot davrida birorta boshqaruv insidenti yoki qonunbuzarlik holati qayd etilmagan.