Turkiya prezidenti: Anqara dunyoga Isroilning insoniyatga qarshi jinoyatlarini unutishiga yo‘l qo‘ymaydi

Turkiya Isroil tomonidan sodir etilgan insoniyatga qarshi jinoyatlarning xalqaro maydonda e’tibordan chetda qolmasligi uchun jadal harakat qilmoqda.

Bu haqda Turkiya prezidenti Rajab Toyyib Erdo‘g‘anning Istanbuldagi Shisli tumanidagi mehmonxonalardan birida tashkil etilgan Islom hamkorlik tashkiloti (IHT) 5-Bosh assambleyasi Yoshlar forumi ishtirokchilariga yo‘llagan videomurojaatida aytiladi.

Erdog‘an, musulmon yoshlarni iqtisodiy, madaniy va ijtimoiy sohalarda faollashtirish va o‘ziga ishonchni rivojlantirish uchun keng ko‘lamli faoliyat olib borayotgan forumni tabrikladi.

Davlat rahbari Isroil tomonidan 7-oktabrdan buyon G‘azo sektori va bosib olingan Falastin hududlarida amalga oshirilayotgan qirg‘inlarda yoshlarning birgalikdagi sa’y-harakatlari yanada katta ahamiyat kasb etganini ta’kidladi.

«Butun dunyoning ko‘z o‘ngida isroillik bosqinchi kuchlari 28 ming falastinlikni vahshiylarcha o‘ldirdi, ularning aksariyati bolalar va ayollar. Isroilning tinch aholiga to‘g‘ridan-to‘g‘ri qaratilgan bombardimonlari natijasida 67 mingdan ortiq begunoh falastinlik jarohat oldi», deb esladi Turkiya rahbari.

Ibodatxonalar, maktablar, shifoxonalar va barcha fuqarolik infratuzilmasi fashistlarning hujumlarini eslatuvchi Isroil hujumlari nishoniga aylangan, deya eslatdi Turkiya prezidenti.

Davlat rahbari Anqara falastinliklarga yordam ko‘rsatish, jumladan, insonparvarlik yordami ko‘rsatish va saraton kasalligiga chalingan bemorlarni Turkiyada davolashni tashkil etish uchun barcha imkoniyatlarni ishga solishda davom etishini ta’kidladi.

G‘azo sektoridagi Isroil shafqatsizligiga qarshi islom davlatlarining birgalikda harakat qilishini ta’minlash uchun diplomatik sa’y-harakatlar qilinmoqda, dedi Erdog‘an.

«Falastindagi ishg‘ol siyosati va qirg‘inlar to‘xtasa, biz 1967 yildagi chegaralari va poytaxti Quddus bo‘lgan mustaqil, suveren va hududiy yaxlit Falastin davlati tuzilmaguncha kurashni davom ettiramiz», dedi prezident.

Erdo‘g‘an, IHT Yoshlar Forumining Falastin masalasida doimo ko‘rsatgan tushunchasi va faol pozisiyasi uchun minnatdorchilik bildirdi.