Qoraqalpog‘istonda “Rally Muynak” xalqaro avtopoygasi bo‘lib o‘tadi

25-28-may kunlari Qoraqalpog‘istonda “Rally Muynak” xalqaro avtopoygasi bo‘lib o‘tadi.

Musobaqada 150 ga yaqin sportchi 40 ta sport avtomobili, 20 dan ortiq motosikl va 10 dan ortiq aravachada bellashishi kutilmoqda, deb xabar beradi O‘zbekiston Turizm va sport vazirligi.

Avto va motokross uzunligi 425 kilometr bo‘lgan maxsus trekda o‘tkaziladi. Uning asosiy qismini Ustyurtning cho‘l-yo‘lsiz uchastkalari va Orol dengizining qurigan tubi tashkil etadi.

Avtopoyga doirasida gastronomik seminarlar, oshpazlar chiqishlari va elektron musiqa konsertlari ham o‘tkaziladi.