“Qanday qilib uyga kirishim mumkin?”

— Men kelin bo‘lib tushgan uy qaynonamning nomida. Turmushimiz boshida yaxshi edi. Keyin erim bilan har hil kelishmovchiliklar bo‘la boshladi. 2021 yil mart oyida men va ikki nafar voyaga yetmagan bolalarim bilan qaynonam uydan xaydab yubordi. Bir necha marotaba mahallaga murojaat qildim, lekin ijobiy natija bo‘lmadi. Qanday qilib uyga kirishim mumkin?

S.O., Toshkent shahri

Murojaatga Fuqarolik ishlari bo‘yicha Mirobod tumanlararo sudi raisi Bexzod SAGATOVdan javob oldik:
— Uy-joy kodeksining 52-moddasi talabiga ko‘ra, munisipal, idoraviy uy-joy fondi va aniq maqsadli kommunal uy-joy fondining uylaridagi turar joyni ijaraga oluvchi, uning oila a’zolari yoki ijaraga oluvchi bilan doimiy yashayotgan fuqarolar vaqtincha bo‘lmaganida turar joy olti oy muddat davomida ularning hisobida saqlanib turadi.
Bu bilan birga, Uy-joy kodeksining 32-moddasi 1-qismiga ko‘ra, uy, kvartira mulkdorining oila a’zolari, shuningdek u bilan doimiy yashayotgan fuqarolar, agar ularni ko‘chirib kelgan paytda yozma ravishda boshqa hol qayd etilgan bo‘lmasa, uydagi, kvartiradagi xonalardan mulkdor bilan teng foydalanishga haqli. Ular mulkdor bergan turar joyga o‘zlarining voyaga yetmagan farzandlarini ko‘chirib kiritishga haqlidirlar. Oilaning boshqa a’zolarini esa uy, kvartira mulkdorining roziligi bilangina ko‘chirib kiritishlari mumkin. Bu shaxslar uy, kvartiraning mulkdori bilan oilaviy munosabatlarni tugatgan taqdirda ham ularda turar joydan foydalanish huquqi saqlanib qoladi. Uy, kvartiraning mulkdori bilan uning sobiq oila a’zolari, shuningdek, u bilan doimiy yashayotgan fuqarolar o‘rtasida turar joydan foydalanish tartibi taraflar kelishuvi bilan belgilanadi.
Ushbu holatda tegishli sudga uyga kiritish masalasi bo‘yicha sudga da’vo ariza bilan murojaat qilish huquqiga egasiz.