Oltin izidagi operasiya: bojxonachilar noqonuniy aylanmani tizginlashdi

Bojxonachilar yil boshidan buyon salkam 40 kg. zargarlik buyumlarining noqonuniy olib o‘tilishiga chek qo‘yishdi.

Respublikamiz bojxonachilari tilla va boshqa qimmatbaho metallardan ishlangan zargarlik buyumlarini bojxona chegaralari orqali noqonuniy ravishda olib o‘tilishi va ichki hududdagi yashirin aylanmasiga chek qo‘yishga qaratilgan chora-tadbirlarni muntazam davom ettirishmoqda.

Jumladan, “Toshkent-AYEro” ixtisoslashtirilgan bojxona kopleksining “Toshkent xalqaro ayeroporti” chegara bojxona postida zargarlik buyumlarini qonunga xilof tarzda olib kirishga bo‘lgan qator urinishlar fosh qilindi.

Bangkokdan uchib kelgan yo‘lovchilardan biri yuklari orasidagi shirinliklar ichiga qiymati dastlabki hisob-kitoblarga ko‘ra 180 mln so‘mdan oshiq bo‘lgan 121 gr. og‘irlikdagi zargarlik buyumlarini yashirgancha olib kirishga uringan vaqtida to‘xtatib qolindi.

“Toshkent-Istanbul” reysi bo‘yicha parvozini yakunlangan qo‘shni davlat fuqarosi ham bagajidagi yuklari orasida qiymati 350 mln so‘mlik 370 gr. og‘irlikdagi zargarlik buyumlarini yashirib olib kirayotganida fosh qilindi.

Bokudan kelgan yo‘lovchilar orasida ham qimmatbaho toshlar bilan bezatilgan tilla taqinchoqlarni bojxona nazoratiga taqdim qilmasdan olib o‘tishga uringan shaxs borligi aniqlandi. Qo‘shni davlat fuqarosi bo‘lgan mazkur yo‘lovchi qiymati salkam 130 mln so‘mlik hamda olmos toshlari bilan bezatilgan 74 gr. og‘irlikdagi zargarlik buyumlarini noqonuniy ravishda olib kirishga uringan ekan.

Hozirda yuqoridagi holatlar yuzasidan bojxona tekshiruvlari davom etmoqda.

Raqamlarga ko‘ra, respublikamiz bojxonachilari tomonidan joriy yilning o‘tgan davri mobaynida aniqlangan 252 ta bojxona qonunbuzilishi holatlarida qiymati 24,3 mlrd so‘mlik salkam 40 kg. og‘irlikdagi zargarlik buyumlarining bojxona chegaralari olib noqonuniy ravishda olib o‘tilishi va ichki hududdagi yashirin aylanmasiga chek qo‘yilgan.

Eslatib o‘tamiz, jismoniy shaxslar 2025 yilning 20 iyulidan e’tiboran shaxsiy ehtiyoj uchun mo‘ljallangan zargarlik buyumlarini notijorat maqsadlarida respublikaga olib kiriladigan tovarlarning bojsiz olib kirish normalari doirasida olib kirishlari mumkin.

Mazkur norma havo transportida — 1000 AQSh dollari, temir yo‘l va daryo transportida — 500 AQSh dollari hamda avtomobil (piyoda) o‘tkazish punktlari orqali — 300 AQSh dollarini tashkil qiladi.

Olib chiqishda esa jismoniy shaxslarga og‘irligi 200 grammgacha bo‘lgan kumushdan hamda 65 grammgacha bo‘lgan oltin va boshqa qimmatbaho metallardan yasalgan tayyor zargarlik buyumlarini yo‘lovchi bojxona deklarasiyasini to‘ldirmasdan, ushbu miqdorlardan ortiq bo‘lganlarini yo‘lovchi bojxona deklarasiyasi asosida O‘zbekiston Respublikasi bojxona hududidan tashqariga olib chiqishga ruxsat beriladi.