Korrupsiya – jamiyat kushandasi

Jinoyat ishlari bo‘yicha Yashnobod tuman sudi va jinoyat ishlari bo‘yicha Sirg‘ali tuman sudi sudyalari tomonidan “9 dekabr – Xalqaro korrupsiyaga qarshi kurash” kuni munosabati bilan “Korrupsiya rivojlanishimizga to‘siq” hamda “Zo‘ravonlikka qarshi kurashish chora tadbirlari” mavzularida ochiq muloqotlar o‘tkazildi. Bu haqda Toshkent shahar sudi matbuot xizmati xabar qildi...

Jinoyat ishlari bo‘yicha Yashnobod tuman sudining sudyalari tomonidan Muhammad Al-Xorazmiy nomidagi axborot-texnologiyalari va kommunikasiya yo‘nalishiga oid fanlarni chuqurlashtirib o‘qitishga ixtisoslashtirilgan maktabda davra suhbati bo‘lib o‘tdi. O‘zbekiston Respublikasi Prezidenti huzurida 2020 yil 30 iyun kuni o‘tkazilgan odil sudlovni ta’minlash hamda korrupsiyaga qarshi kurashish tizimini takomillashtirish chora-tadbirlariga bag‘ishlangan 49-sonli yig‘ilish bayoni ijrosi yuzasidan ishlab chiqilgan Toshkent shahrida jinoyatlarni jilovlash, jinoyatchilik profilaktikasini yanada takomillashtirish, odil sudlovni ta’minlash va korrupsiyadan holi hududga aylantirish bo‘yicha “Yo‘l xaritasi”ning 3-bandi bandi ijrosi yuzasidan tashkil qilingan mazkur davra suhbatida tuman prokuraturasi, Yashnobod tuman IIO FMB xodimlari, Muhammad Al-Xorazmiy nomidagi axborot-texnologiyalari va kommunikasiya yo‘nalishiga oid fanlarni chuqurlashtirib o‘qitishga ixtisoslashtirilgan maktabning professor, o‘qituvchi va o‘quvchilari ishtirok etishdi.

Davra suhbati jarayonida, jinoyat ishlari bo‘yicha Yashnobod tuman sudining sudyalari Anvar Ikromov, Umidjon Xanayev yig‘ilganlarga “9 dekabr – Xalqaro korrupsiyaga qarshi kurash” kuni munosabati bilan “Korrupsiya rivojlanishimizga to‘siq” hamda “Zo‘ravonlikka qarshi kurashish chora tadbirlari” mavzularida ochiq muloqot hamda mavzu doirasida huquqiy tushuntirish ishlari olib borishdi. Professor va o‘qituvchilar tomonidan berilgan bir necha Korrupsiyani oldini olish oid va sud sohasida qilinayotgan ishlarga oid savollarga javoblar ham berildi.

Jinoyat ishlari bo‘yicha Sirg‘ali tuman sudi sudyalari Farhod Shukurov, Sherzod Yuldashev, Boxodirjon Yusupov, Muzaffar Kukiyev, Anvar Dusmurodov tomonidan esa tumandagi “Nilufar” va “Yangi Sirg‘ali” MFYda tuman prokurorining katta yordamchisi B.Akromov, Sirg‘ali tuman IIO FMB Probasiya bo‘limi xodimlari, profilaktika inspektorlari, mahalla faollari ishtirokida “Korrupsiyaga qarshi kurashish bo‘yicha amalga oshirilayotgan islohotlar” mavzusida sayyor uchrashuvlar o‘tkazildi.

Ishtirokichilarga mamlakatimizda so‘nggi yillarda korrupsiyaga qarshi kurashish bo‘yicha amalga oshirilayotgan islohotlar, bu yo‘nalishda qabul qilingan qonunlar va davlat dasturlari, amaliy sa’y-harakatlar, shuningdek mazkur turdagi jinoyatlarni sudlarda ko‘rish amaliyoti va ular uchun belgilangan javobgarlik masalalari xususida ma’lumot berildi.

— Jinoyat kodeksidagi korrupsiya bilan bog‘liq jinoyatlar toifasiga 167-modda (o‘zlashtirish yoki rastrata yo‘li bilan talon-toroj qilish), 168-modda (firibgarlik), 192-9-modda (tijoratda pora evaziga og‘dirib olish), 192-10-modda (nodavlat tijorat tashkilotining yoki boshqa nodavlat tashkilotining xizmatchisini pora evaziga og‘dirib olish)ni iqtisodiyot sohasidagi korrupsiyaga oid jinoyatlar; 205-modda (hokimiyat yoki mansab vakolatini suiiste’mol qilish), 206-modda (hokimiyat yoki mansab vakolati doirasidan chetga chiqish), 208-modda (hokimiyat harakatsizligi), 209-modda (mansab soxtakorligi), 210-modda (pora olish), 211-modda (pora berish), 212-modda (pora olish-berishda vositachilik qilish)ni boshqaruv tartibiga qarshi korrupsiyaga oid jinoyatlar; 236-modda (tergov qilishga yoki sud ishlarini hal etishga aralashish), 238-modda (yolg‘on guvohlik berish), 241-modda (jinoyat haqida xabar bermaslik yoki uni yashirish) kabilarni odil sudlovga qarshi korrupsiyaga oid jinoyatlar; 243-modda (jinoiy faoliyatdan olingan daromadlarni legallashtirish)ni jamoat tartibiga qarshi korrupsiyaga oid jinoyatlar toifasiga kiritish mumkin. Shunga ko‘ra, korrupsiyaga oid jinoyatlarni o‘z vaqtida aniqlash, ularga chek qo‘yish, ularning oqibatlarini, ularga imkon beruvchi sabablar va shart-sharoitlarni bartaraf etish, korrupsiyaga oid jinoyatlarni sodir etganlik uchun javobgarlikning muqarrarligi prinsipini ta’minlash korrupsiyaga qarshi kurashish sohasidagi davlat siyosatining asosiy yo‘nalishlaridan biri etib belgilangan, - deydi sudya Farhod Shukurov.

Yig‘ilish so‘ngida korrupsiyaning oldini olishga doir olib borilayotgan chora-tadbirlar, o‘tkazilayotgan profilaktik ishlar, davlat xizmatlarining takomillashuvi, aholining ijtimoiy-iqtisodiy rivojlantirishda amalga oshirilishi lozim bo‘lgan navbatdagi tizimli vazifalar borasida ishtirokchilar o‘z fikr-mulohazalarini bayon etishdi.

O‘z navbatida, sudlar ham manfaatdor vazirlik va idoralar bilan birgalikda korrupsiyani oldini olish borasida mamlakatimizda korrupsiyaga qarshi kurashish sohasida muhim tashkiliy-huquqiy islohotlarni amalga oshirishga, jinoyatchilik, shu jumladan, korrupsiya bilan bog‘liq jinoyatlarni oldini olish va ularga barham berish, aholining huquqiy ongi va huquqiy madaniyatini oshirishga, jamiyatda korrupsiyaga murosasiz munosabatni shakllantirishga yo‘naltirilgan tizimli choralar ko‘rilishiga mas’ulligi muhim ahamiyatga egaligi ta’kidlandi.