Koreya va Markaziy Osiyo parlamentlari hamkorligida yangi tashabbuslar amalga oshiriladi

Seul shahrida Markaziy Osiyo davlatlari va Koreya Respublikasi o‘rtasidagi hamkorlik bo‘yicha parlament spikerlari yig‘ilishi bo‘lib o‘tdi. Unda O‘zbekiston Senati Raisi Tanzila Norboyeva ishtirok etdi.

Parlamentlararo hamkorlikning “5 + 1” formatida tashkil etilgan mazkur platformadan ko‘zlangan maqsad mamlakatlar o‘rtasidagi ko‘p qirrali muloqotni yanada mustahkamlashdir.

Tadbirning asosiy sessiyasi “Markaziy Osiyo mamlakatlari va Koreya Respublikasi o‘rtasidagi mintaqaviy hamkorlik istiqbollari va ustuvor yo‘nalishlar: keyingi 30 yil uchun shiddatli harakat” mavzusiga bag‘ishlandi.

Markaziy Osiyo davlatlari va Koreya Respublikasi o‘rtasidagi ko‘p qirrali hamkorlik oliy darajadagi kelishuvlarni amalga oshirish va amaliy hamkorlikni kengaytirishda parlamentlararo muloqot muhim ahamiyat kasb etayotgani ta’kidlandi.

Senat Raisi T.Norboyeva 15 yildan ortiq davr davomida ish olib borayotgan “Markaziy Osiyo + Koreya” hamkorlik formatining o‘rni muhimligini ta’kidladi. Mazkur format investisiyalar, innovasiyalar, transport, sog‘liqni saqlash, ta’lim va madaniyat hamda boshqa sohalarda o‘zaro hamkorlikni kengaytirish bo‘yicha yangi tashabbus va g‘oyalarni ilgari surmoqda.

Texnologiyalar, innovasiyalar va “yashil iqtisodiyot” sohasida parlamentlararo hamkorlikni chuqurlashtirish, muqobil energiya va “yashil” vodorod ishlab chiqarish sohasida Koreya sarmoyalarini jalb qilish va yangi texnologiyalarni joriy etish kabi masalalar shular jumlasidandir.

“Markaziy Osiyo mamlakatlari va Koreya Respublikasi o‘rtasidagi iqtisodiy hamkorlik” mavzusiga bag‘ishlangan sessiyada dunyoda kechayotgan nizolar, jahon iqtisodiyotidagi salbiy tendensiyalar, beqaror xalqaro savdo-iqtisodiy munosabatlar sharoitida ko‘p qirrali va o‘zaro manfaatli hamkorlik, jumladan, parlamentlararo muloqot orqali sa’y-harakatlarni birlashtirish masalalariga e’tibor qaratildi.

– Markaziy Osiyo mamlakatlari va Koreya Respublikasi o‘rtasidagi savdo-iqtisodiy va sarmoyaviy hamkorlikni yanada rivojlantirish mintaqaviy hamkorlikning asosiy drayveri bo‘la oladi, – dedi T.Norboyeva. – Savdo-iqtisodiy va sarmoyaviy aloqalarni mustahkamlash bo‘yicha amaliy hamkorlikni rivojlantirish uchun barcha zarur shart-sharoitlarni yaratishda parlament muhim o‘rin tutadi.

“Markaziy Osiyo mamlakatlari va Koreya Respublikasi o‘rtasida raqamli transformasiya sohasidagi hamkorlik” mavzusidagi sessiyada esa ishtirokchilar e’tibori iqtisodiy taraqqiyot va raqamlashtirish jarayonlarining muvaffaqiyati, iqtisodiyotning turli tarmoqlariga sun’iy intellektning keng joriy etilishi masalalariga qaratildi.

Sessiyada Koreya Respublikasi ko‘magida Toshkent shahrida ilmiy-tadqiqot ishlarini olib borish, malakali kadrlar tayyorlash va mintaqadagi barcha mamlakatlar ehtiyojlari uchun ommabop IT - mahsulotlarni ishlab chiqishga yo‘naltirilgan sun’iy intellektni o‘rganish va rivojlantirish bo‘yicha Markaziy Osiyo markazini tashkil etish hamda raqamlashtirish sohasida Koreyaning yetakchi universitetlari bilan ushbu sohada malakali kadrlar tayyorlash bo‘yicha hamkorlikni yo‘lga qo‘yish taklifi ilgari surildi.

Yig‘ilishda “Markaziy Osiyo – Koreya Respublikasi” parlamentlararo hamkorlikning navbatdagi yig‘ilishini 2024 yilda Ashxobodda o‘tkazish taklifi qo‘llab-quvvatlandi.

Tadbir yakunida Markaziy Osiyo davlatlari va Koreya Respublikasi parlamentlari spikerlarining birinchi yig‘ilishi qo‘shma deklarasiyasi qabul qilindi.