Fransiya va Italiya Ukrainaga SAMP-T havo mudofaa tizimlarini yetkazib beradi
Fransiya va Italiya shu yilning bahorida Ukrainaga SAMP-T-Mamba zenit-raketa komplekslarini yetkazib beradi, deb yozdi Fransiya qurolli kuchlari vaziri Sebastyan Lekornu Tvitter’da.
Unga ko‘ra, yetkazib berish Italiya mudofaa vaziri Gido Krosetto bilan kelishilgan.
SAMP-T-Mamba - bu ballistik va qanotli raketalarni, shu jumladan radarga qarshi raketalarni, shuningdek, samolyotlarni yo‘q qilish uchun mo‘ljallangan o‘rta masofali havo hujumidan mudofaa tizimi.
U Aster 30 tutuvchi raketalaridan foydalanadi.
SAMP-T bir vaqtning o‘zida 16 xil havo nishonlarini ura oladi. Ikki ishga tushirish moslamasi juda yuqori tezlikda o‘q otish qobiliyatiga ega, barcha o‘q-dorilarini 10 soniyada qo‘yib yuboradi.
Ukraina prezidenti Vladimir Zelenskiy Fransiya prezidenti Emmanuel Makron va Italiya bosh vaziri Mario Dragidan oktyabr oyi boshida Ukrainaga SAMP-T yetkazib berishni so‘radi.
