Dubayga fohishalik bilan shug‘ullantirish uchun ayol sotgan sudlanuvchiga hukm o‘qildi

“Pul bor-yo‘g‘i bir vosita. Ular sizni istagan joyingizga eltadi, lekin yo‘lning yo‘nalishini o‘zingiz tanlashingiz kerak”, degan edi amerikalik faylasuf Ayn Rend. Muqaddam bir necha bor sudlanib, bundan to‘g‘ri xulosa qilish o‘rniga, mo‘may daromad topishni maqsad qilgan “qahramon”imizning tanlovi esa qing‘ir yo‘ldan yurishda to‘xtaldi.

42 yoshli Dilnoza (ismi o‘zgartirilgan) 2013 yil 6 oktyabr kuni Xulkaroy va boshqa shaxslar bilan oldindan til biriktiradi. Ular tanishi Lazokatxonni BAA davlati Dubay shahrida maoshi katta bo‘lgan ishga joylashtirib qo‘yishni aytib, qo‘ynini puch yong‘oqqa to‘ldirishadi. Aslida esa uni BAA davlatida fohishalik bilan shug‘ullantirish maqsadida yollashgandi. Jabrlanuvchi Lazokatxonni Xulkaroyning ko‘rsatmasi asosida 2013 yilning oktyabrida Andijon viloyati orqali Qirg‘izistonga o‘tkazishgan. Qirg‘iziston Respublikasi hududida uni boshqa shaxs kutib olib, Lazokatxonga berilgan fuqarolik pasportida dunyoning barcha mamlakatlariga chiqish huquqini beruvchi “ruxsat yozuvi” – viza stikerini rasmiylashtirilmaganini bila turib, belgilangan chet elga chiqish tartibini buzadi. Ayolni 2013 yil 12 oktyabr kuni “Bishkek-Dubay” yo‘nalishidagi avia reys bilan BAA davlatiga qonunga xilof ravishda yuborgan. Uni Dubay shahrida Xulkaroy kutib olib, fuqarolik pasportini olib qo‘ygan holda boshqa shaxslar bilan 2014 yil 15 yanvar kuniga qadar majburan fohishalik bilan shug‘ullantirgan.

Bundan tashqari, Dilnoza viza stikerini rasmiylashtirmay, Prezidentning 2017 yil 16 avgust kungi “O‘zbekiston Respublikasi fuqarolarining xorijga chiqish tartibini takomillashtirishga doir chora-tadbirlar to‘g‘risidagi”gi PF-5156 sonli farmoni 3-bandi talablariga rioya qilmasdan belgilangan chet elga chiqish tartibini takroran buzgan. Aniqrog‘i, Ukraina davlati orqali 2013 yil 3 dekabr kuni BAA davlatiga qonunga xilof ravishda borganligi aniqlanib, mazkur holat yuzasidan tegishli hujjatlar rasmiylashtirilgan.

“AYBIMGA IQRORMAN...”

Sudlanuvchi Dilnoza sudda aybiga qisman iqror bo‘lgan...

— Haqiqatdan ham 2013 yilning sentyabrida Farg‘ona viloyatida Lazokat bilan tanishib qolganman. U turmushidan ajrashganini va sharoiti og‘irligini, biror yaxshiroq ish bo‘lsa ishlashini ma’lum qilgan. Unga Dubayda tanishim Xulkaroy fohishalik bilan shug‘ullanishini, u ham uning oldiga borgan holda fohishalik qilib yaxshi pul topishi mumkinligini taklif qilganman. Bundan tashqari, unga o‘zim ham Xulkaroyning oldiga ishlash uchun bormoqchiligimni, biroq fuqarolik pasportimni almashtirish uchun berganim sababli birga bora olmasligimni tushuntirganman. Bola parvarishlash bilan shug‘ullanishi haqida aytmaganman. 2013 yil 6 oktyabr kuni Lazokatdan Dubayga ishga borish yoki bormasligini so‘raganimda, chipta sotib olish uchun puli yo‘qligini aytdi. Yo‘l xarajatlarini barchasini tanishim Xulkaroyning o‘zi qoplashini, Dubay shahriga borganidan so‘ng ishlab qaytarishini aytdim. Shundan so‘ng Lazokat rozi bo‘ldi va fuqarolik pasportini BAA davlatiga kirish uchun “viza”ni rasmiylashtirish maqsadida berdi. Xulkaroyga Lazokatning pasport nusxasini faks orqali yubordim. Oradan biroz vaqt o‘tganidan so‘ng Lazokatning nomiga BAA davlati Dubay shahriga borish uchun viza chiqdi. Bu haqda Lazokatga ma’lum qildim.

Oilaviy sharoitim og‘irligi sababli pul topish maqsadida viza stikerini rasmiylashtirmay, 2013 yil dekabrda Ukrainaning Kiyev shahri orqali BAA davlatining Dubay shahriga borganman. Lazokat Xulkaroyni kutib olgan va u bilan 2014 yilning iyuniga qadar fohishalik bilan shug‘ullangan. 2014 yil iyunda BAA davlatidan Turkiyaning Istanbul shahriga bordim. U yerda 2014 yildan 2020 yilga qadar qadoqlovchi bo‘lib ishladim. 2020 yilning yanvarida Toshkentga uchib keldim. Chegara nazorati xodimlari fuqarolik pasportimni tekshirib ko‘rib, stiker ruxsatnomasini olmasdan Ukraina davlati orqali BAA davlati noqonuniy borganimni va qidiruvda ekanimni aytishdi. Nima sababdan Lazokat mening ustimdan ariza yozganini va unga qarshi ko‘rsatmalar berayotganini izohlab bera olmayman. Menga 400 AQSh dollarini Xulkaroy yordam tariqasida yuborgan. Bu pulni Lazokatni topib berganim uchun olmaganman. Hozirda qilgan ishimdan chin ko‘ngildan pushaymonman. Aybimga iqrorman...

“BAA DAVLATIGA DILNOZANING GAPLARIGA ISHONGANIM UCHUN BORGANMAN”

Jabrlanuvchi Lazokatxon sudda quyidagilarni bayon qilgan...

— Haqiqatdan ham 2013 yilning sentyabrida Farg‘ona viloyati Quva shahrida Dilnoza bilan tanishib qolganman. U bilan telefon orqali muloqot qilib turganman. U menga BAA davlatida ishlab kelib, ikki xonali uy olganini aytgan. “Agar xohlasangiz sizni ham Dubay shahridagi tanishlarimning oldiga ishlash uchun yuborishda yordam berishim mumkin”, degan. Bundan tashqari, Dilnoza Dubayda Xulkaroy ismli tanishi borligi, u barcha yo‘l xarajatlarini qoplagan holda Dubayga olib borishini va u yerda mahalliy aholining bolalariga qarash bilan shug‘ullanishimni aytgan. Dilnoza bilan birga BAA davlatiga borishga rozi bo‘lganman. So‘ng u BAA davlatiga borish uchun chipta hamda mazkur davlatga kirish uchun viza rasmiylashtirish uchun fuqarolik pasportini olgan. Oradan biroz vaqt o‘tganidan so‘ng Dilnoza bilan internet orqali BAA davlatida tanishlari bilan gaplashganman. Ular meni ko‘rib, bir qancha ma’lumot so‘rashgan. Keyingi kun Dilnoza mening oldimga keldi va fuqarolik pasportimni berib, tanishlari menga qo‘ng‘iroq qilishini aytdi. Keyin Xulkaroy bilan gaplashdim va uning ko‘rsatmasiga asosan Qirg‘iziston orqali 2013 yil 12 oktyabr kuni BAA davlatiga bordim. U yerda meni Xulkaroy kutib oldi va meni Ozarbayjon millatiga mansub ayolga tashlab ketdi. U ayol menga qilgan xarajatlarini chiqarib olish uchun fuqarolik pasportimni olib qo‘ydi va 2014 yilning yanvariga qadar majburan fohishalik bilan shug‘ullantirdi. U ayolga fohishalik qilib, 8000 AQSh dollar pul ishlab berganman. Dilnoza meni topib bergani va Dubayga yuborgani uchun unga 400 AQSh dollari jo‘natganini ma’lum qildi. Dubayga viza rasmiylashtirish uchun pasportimni bergan vaqtimda bankdan 400 AQSh dollari miqdorida pul olganini ko‘rganman. Dilnoza pulni yigiti yuborganini aytib aldagan. BAA davlatiga Dilnozaning gaplariga ishonganim uchun borganman.

G‘afur Amonov, Toshkent shahar sudining jinoyat ishlari bo‘yicha sudyasi:

— Sudlanuvchi JK 135-moddasi 2-qismining “e” “z” “i” bandlari, 223-moddasi 2-qismining “b”, “v” bandlarida nazarda tutilgan jinoyatlarni sodir etganlikda aybli deb topildi. JKning 59-moddasi tartibda tayinlangan jazolarni qisman qo‘shish yo‘li bilan uzil-kesil 5 yil 1 oy muddatga ozodlikdan mahrum qilish jazosi tayinlandi.

JKning 62-moddasi talablariga asosan sudlanuvchining 15 kun dastlabki qamoqda saqlangan har bir kunini ozodlikdan mahrum qilish jazosining bir kuniga tenglashtirib hisoblab, tayinlangan jazodan 15 kunni chegirib, 5 yil 15 kun ozodikdan mahrum qilish jazosi qoldirildi.

JKning 72-moddasiga asosan tayinlangan jazo shartli hisoblanib, sudlanuvchiga 1 yil sinov muddati belgilandi.