Bokudan Farg‘onaga parvozlar yo‘lga qo‘yildi
15 dekabr kuni mahalliy vaqt bilan soat 04:15da Ozarbayjonning “Azal” aviakompaniyasining samolyoti Farg‘onaga kelib qo‘ndi.
Boku-Farg‘ona-Boku yo‘nalishini ochgan Airbus A320 borti an’anaviy tarzda suv arkasi bilan, ekipaj va yo‘lovchilar esa karnay va surnay sadolari ostida tantanali ravishda kutib olindi.
Muntazam reyslar haftada bir marta — payshanba kunlari amalga oshirilishi rejalashtirilgan.
Aytish joizki, Farg‘ona Ozarbayjon aviatashuvchisi parvoz qila boshlagan O‘zbekistondagi uchinchi shaharga aylandi. Bokudan Toshkentga reyslar haftasiga ikki marta — payshanba va yakshanba kunlari muntazam ravishda amalga oshiriladi. Bokudan Samarqandga — seshanba va payshanba kunlari.
1992-yilda tashkil etilgan "Ozarbayjon Havo Yo‘llari" (Azal) yirik aviatashuvchi bo‘lib, Boeing va Airbus samolyotlarining zamonaviy parkiga ega bo‘lgan, MDH mamlakatlari aviasiya hamjamiyatida yetakchilardan biri hisoblanadi.
