Bankomatlarni shov-shuvli tarzda o‘g‘irlab ketayotgan guruh qo‘lga olindi

Avstriyada shov-shuvli bankomatlarni o‘g‘irlashda gumon qilingan jinoiy guruhning 14 nafar a’zosi qo‘lga olindi. Birgina yil boshidan buyon mamlakatda talon-taroj qilish maqsadida bankomatlar 26 marta portlatilgan.

Bu haqda Federal jinoyat polisiyasi boshqarmasi xabar berdi.

Ma’lum qilinishicha, gumonlanuvchilarning aksariyati asli marokashlik bo‘lgan Niderlandiya fuqarolari. Bu ish bo‘yicha jami 33 nafar shaxsga nisbatan tergov harakatlari olib borilmoqda. Avstriya va Niderlandiya polisiyasi har ikki davlatning 12 ta saytida tintuv o‘tkazdi. 16 ta skuter, 50 dan ortiq mobil telefon, 400-500 gramm portlovchi moddalar, giyohvand moddalar, 39 ming yevro naqd pul musodara qilindi.

So‘nggi yillarda Germaniya va Avstriyada portlashlar yordamida bankomatlarni o‘g‘irlash odatiy holga aylandi. Jinoyatchilar guruhi tunda bankomat oldiga kelib, odatda o‘g‘irlangan mashinada portlovchi moddalar o‘rnatadi va agar portlash natijasida pulga kirish mumkin bo‘lsa, uni olib, haydab ketadi. Germaniyada 2022 yilda 442 ta, 2023 yilda esa 367 ta bankomat shu tarzda portlatilgan. O‘tgan yili Germaniya Ichki ishlar vazirligi bankomatlarni o‘g‘irlashda portlovchi moddalarni qo‘llaganlik uchun jazoni kuchaytirish niyatida ekanligini ma’lum qilgan edi.