Хотини ва ўғлига зўравонлик қилган отага жиноят иши қўзғатилди

Олий Мажлиснинг Инсон ҳуқуқлари бўйича вакили (Омбудсман)га Жиззах вилоятидан Б.О. набирасига отаси томонидан босим ва зўравонлик қилинаётгани бўйича мурожаат қилган.

Мурожаатчининг ёзишича, қизи К.С. 2022 йилдан буён Кореяда ишлайди, унинг 8 ёшли ўғли эса эрининг қарамоғида қолган.

Мурожаатга илова қилинган видеоёзувда эр-хотин видео қўнғироқ орқали гаплашганда, ўзаро жанжаллашгани, ота ўғлининг бўғзига пичоқ тирагани акс этган. Шунингдек, аёл эри томонидан кўп маротаба калтаклангани ва соғлиғига зарар етгани ҳақида гапирган.

Мурожаат дарҳол Омбудсман томонидан назоратга олиниб, ҳолат Жиззах вилоятидаги минтақавий вакил ҳамда Ижтимоий ҳимоя миллий агентлиги Жиззах вилояти бошқармаси билан ҳамкорликда жойига чиқиб ўрганилди.

Аниқланишича, ҳозирда фуқаро К.С.нинг вояга етмаган ўғли бувиси билан яшамоқда. Бола билан суҳбат ўтказилганда, ота-онаси ўртасидаги салбий муносабатдан норози эканини, отаси билан яшашни хоҳламаслиги ҳамда бувиси билан қолишни исташини билдирган. Шундан сўнг, фуқаро К.С.нинг вояга етмаган ўғлига бувиси вақтинчалик васий этиб тайинланди.

Омбудсман ахборот хизматига кўра, ота вояга етмаган фарзандига нисбатан ўлдириш ёки зўрлик ишлатиш билан қўрқитишда ифодаланган ғайриқонуний ҳаракатлари учун Жиноят кодексининг 112-моддаси 1-қисмида назарда тутилган жиноятни қасддан содир этганликда айбланиб, унга нисбатан жиноят иши қўзғатилган.