Ўзбекистон – Туркия: энергетика бозорини ривожлантириш ва тартибга солиш бўйича ҳамкорлик қилади
Яқинда Ўзбекистон делегацияси Туркияда бўлиб, қатор компаниялар фаолияти билан яқиндан танишди.
Ташриф доирасида Ўзбекистон Республикаси Энергетика бозорини ривожлантириш ва тартибга солиш агентлиги директори Шерзод Хўжаев бошчилигидаги делегация «EPDK« компанияси президенти Мустафо Йилмаз билан учрашди.
Учрашувдан мақсад энергетика соҳасида Туркия тажрибасини ўрганиш ва ҳамкорлик имкониятларини кўриб чиқишдир.
Мулоқот чоғида Шерзод Хўжаев Президентимизнинг 2023 йил 28 сентябрдаги фармони асосида ташкил этилган Ўзбекистон Республикаси Энергетика бозорини ривожлантириш ва тартибга солиш агентлигига электр энергияси бозори ислоҳотини тезкорлик билан амалга ошириш вазифаси юклатилгани ва бу жараёнда «EPDK« компаниясининг тажрибаси билан ўртоқлашиш амалий натижага эга эканини қайд этди.
Ўз навбатида, ушбу учрашув томонлар учун электр энергиясини тақсимлаш бўйича хусусийлаштириш ва лицензиялаш масалаларида тажриба алмашишда ҳам аҳамиятлидир.
«EPDK« компанияси президенти Мустафо Йилмаз ҳам делегациянинг ташрифидан мамнунлигини билдириб, Туркия ўзининг етук энергия бозорлари билан минтақасида ўз ўрнига эгалигини, Ўзбекистон электр энергияси бозорини қайта қуриш учун ҳар доим керакли ёрдамни беришга тайёр эканлигини таъкидлади.
Учрашувда мазкур компания вакиллари электр энергияси бозори, энергия конвертацияси, стратегия ишлаб чиқиш, тарифлар каби мавзуларда кенг қамровли тақдимотлар ўтказди.
Мулоқот якунида томонлар ўртасида ўзаро ҳамкорликни мустаҳкамлашга келишиб олинди.
