Украина дронлари Россиянинг Ростов вилоятидаги нефть омборини ёқиб юборди

Россиянинг Ростов вилоятидаги Каменский туманидаги нефть омборига Украина учувчисиз самолёти ҳужум қилди, деб хабар қилди чоршанба куни маҳаллий ҳукумат.

Маълумотларга кўра, дрон ёнғинга сабаб бўлган, натижада бир нечта ёқилғи танкерлари ёниб кетган. Ижтимоий тармоқларда тарқатилган видеоларда тунда катта танкерлар ёнаётгани акс этган.

«Жабрланганлар йўқ. Ўт ўчирувчилар ёнғинни ўчиришмоқда», — деди Ростов губернатори Василий Голубев Телеграм иловасида.

Ҳужумни Россия хавфсизлик хизматларига яқин бўлган База Телеграм канали тасдиқлади.

Россия Мудофаа вазирлиги бир кечада минтақада тўртта дронни йўқ қилганини маълум қилди.

Ростовнинг Пролетарск туманидаги яна бир нефть омборига тахминан 10 кун олдин ҳужум қилинган. У ердаги танкерлар ҳамон ёнмоқда, дейди Россия расмийлари.