Тайван Хитой армиясининг 27 та самолёти яқинлашаётганини аниқлади

Тайван қуролли кучлари Хитой халқ озодлик армиясининг 27 та самолёти оролга яқинлашаётганини қайд этди.

Бу ҳақда орол мудофаа департаменти маълум қилди.

Баёнотда таъкидланганидек, 23 август куни эрта тонгда оролга яқинлашиб келаётган 27 та самолёт, жумладан J-16 қирувчи самолётлари, КJ-500 эрта огоҳлантирувчи самолётлар ва учувчисиз учиш аппаратлари қайд этилган.

Тахминларга кўра, 23 та самолёт Тайван бўғозининг ўрта чизиғини кесиб ўтиб, Хитой кемалари билан биргаликда жанговар патруль ўтказиш учун оролнинг шимолий, марказий, жануби-ғарбий ва шарқий қисмларидаги ҳаво мудофаасини аниқлаш зонасига кирган.

Жума куни эрталаб Тайван мудофаа департаменти 24 соат ичида 41 та самолёт ва 7 та Хитой кемасининг оролга яқинлашгани қайд этилгани ҳақида хабар берди.