"Tashkent Pharma Park" кластерининг илмий салоҳиятини ривожлантиришда Сингапур тажрибаси қўлланилади
Фармацевтика тармоғини ривожлантириш агентлиги кадрлар тайёрлаш салоҳиятини янада кенгайтирмоқда. Агентлик директори А.Азизов бошчилигидаги ишчи гуруҳнинг Жанубий Кореяга ташрифи доирасида Фармацевтика техник университети ва Ёнсей университетининг Фармацевтика факультети ва Корея Миллий биожараёнлар илмий тадқиқот ва малака ошириш институти ўртасида ҳамкорлик бўйича келишув меморандуми имзоланди.
Ёнсей университети жаҳонда юқори нуфузга эга бўлиб, унинг бир гуруҳ етакчи мутахассислари Жанубий Кореянинг EDCF фонди молиявий кўмагида Фармацевтик техник университетининг моддий-техник базасини шакллантириш ҳамда “Фармацевтика”, “Биофармацевтика фанлари”, “Саноат фармацевтикаси”, “Косметик фанлар” ва “Фармацевтика кимёси” йўналишларида ўқув дастурларини ишлаб чиқишда ҳамкорлик қилмоқда. Агентлик ва Ёнсей университети профессорлари билан Фармацевтика техник университети ва фармацевтика соҳасидаги илмий мутахассисларнинг малакасини оширишда ҳам яқиндан ҳамкорлик қилишга келишиб олинди.
Шунингдек, Фармацевтика тармоғини ривожлантириш агентлиги ҳамда Сингапурнинг «CPG International PTE Ltd» консалтинг компанияси ва «BetaLife» компанияси ўртасида илмий-тадқиқот йўналиши бўйича ўзаро манфаатли ҳамкорликни ривожлантириш мақсадида меморандум имзоланди.
Шу билан бирга, «BetaLife» компаниясининг «Tashkent Pharma Park» кластерида илмий-тадқиқот йўналишини ривожлантиришда иштирок этиши бўйича келишувга эришилди. Компания директори, профессор Лим Каҳ Менг «Tashkent Pharma Park» дирекцияси кластернинг илмий-тадқиқот фаолиятига илғор тажриба ва инновацияларни жалб этиш, шунингдек, Сингапур компанияларини кластернинг саноат зонасига жалб этиш борасида ўз таклифларини берди.
Лим Каҳ Менг бошчилигидаги "Metagen" раҳбарияти 2024 йил май ойида кластернинг илмий-тадқиқот салоҳиятини ривожлантиришнинг кейинги истиқболларини муҳокама қилиш, шунингдек, "Metagen" компаниясининг ишлаб чиқариш имкониятларини кластер ҳудудида маҳаллийлаштириш мақсадида Ўзбекистонга таклиф этилди.
