Сенсация! Ёмғир томчисидан электр энергияси олинди
Шу пайтгача олимлар сув томчиларидан етарли даражада энергия олиш йўлини топиша олмаётган эди. Ва ниҳоят, бу йўналишда ҳам бурилиш содир бўладиганга ўхшаяпти. “Nature” журналида чоп этилган мақолада хитойлик инженерлар америкалик ҳамкасблари билан ҳамкорликда бунинг уддасида чиққанлиги ҳақидаги илмий усулларини маълум қилишган.
Тўғри, ўз-ўзимизни алдамайлик, ҳозирча бу йўналишда олинаётган электрда смартфонни ҳам қувватлантириб бўлмайди. Бунгача ҳали анча бор. Бироқ, ишлаб чиқилган услуб, умид уйғотади. Гап шундаки, тадқиқотчилар ёмғирнинг биттагина томчисидан 100 та светодиод лампочкаларини ёритиш учун етадиган усулни ишлаб чиқди.
Электр қуввати олишнинг бундай услуби кўп йиллардан бери олимларни ўйлантириб келарди. Ёмғир томчилари қувватини электр қувватига айлантириш физикаси, оқимдан энергия олишга қараганда бир мунча мураккаб. Мунтазам равишда томчилар тушаётган майдондан политетрафторетилен пленкалари (PTFE) орқали зарядларни йиғиб олиш ғояси умумий мақсаднинг салгина силжишига кўмаклашди.
Томчи юзага тушганида ёйилиб кетиб, худди икки электрод – алюмин электроди ва идний-қалай оксиди электродини бирлаштирувчи кўприк вазифасини бажариши аниқланди. “Томчи кўприк” ўз навбатида ёпиқ ҳалқа ҳосил қилади, натижада йиғилган энергия озод бўлади, чиқиб кетади. Томчилар резистор, юза эса конденсатор вазифасини бажаради.
Бундай услубни сув қаттиқ юзага тушадиган ҳамма жойда қўллаб кўриш мумкин. Бироқ, ёмғир смартфонимизни қувватлантиришни бошлашидан олдин анчагина ҳаракатларни амалга ошириши керак бўлади. Прототипни яқин 5 йил ичида яратиш мўлжалланган.
