Қозоғистонда энергетик ичган эркак хуружга учради
Қозоғистонда икки банка энергетик ичимлик ичган эркак шифокорлар ёрдамига муҳтож бўлиб қолди. Бу ҳақда мамлакат Фавқулодда вазиятлар вазирлиги хабар берди.
“Тун ярмида Олмаотадан Қорағандага кетаётган автомобиль йўловчиларидан бирининг соғлиғи ёмонлашгани ҳақида тиббий-қутқарув пунктига чақирув келиб тушди”, дейилади хабарда.
Воқеа жойига тез тиббий ёрдам гуруҳи етиб келган. Улар 1981 йилда туғилган эркакка икки банка энергетик ичимлик ичганидан кейин юзага келган ўткир панкреатит ташхисини қўйган.
Қутқарувчилар унга биринчи тиббий ёрдам кўрсатиб, Балхаш шаҳридаги шифохонага олиб борган. ФВВ энергетик ичимликларни ҳаддан ташқари истеъмол қилиш инсон саломатлигига салбий таъсир кўрсатиши мумкинлигини таъкидлаган.
Ўткир панкреатит — ошқозон ости безининг яллиғланиши бўлиб, унинг тўқималарининг тузилиши ўзгаришига олиб келади. Касалликка хос белгилар қуйидагича:
- бутун қорин бўшлиғида тўсатдан пайдо бўладиган кучли оғриқлар;
- жиғилдон қайнаши;
- қусиш хуружлари;
- қориннинг дам бўлиши ва ичак газлари тўпланиши;
- умумий аҳволнинг ёмонлашуви: тана ҳароратининг кўтарилиши, қон босимининг тушиши, юрак уришининг тезлашуви, кўп терлаш, терининг оқариши ёки сарғайиши.
Сурункали панкреатитда кучли оғриқлар камроқ учрайди, улар фақат зарарли овқат ва ичимликларни ҳаддан ташқари истеъмол қилгандан кейингина пайдо бўлади.
