Қирғизистонда кўча чироқларини ўчириш талаб қилинди
Қирғизистон миллий энергохолдинги куз-қиш мавсумида номаиший истеъмолчиларнинг кўчалар ва рекламаларни ёритишини ман этди. 24.kg нашрининг хабар беришича, ушбу тақиқ кафе, ресторан, ҳаммом, сауна, дўконлар ва паркларга тегишли.
Бундай қарор Токтогул сув омборидаги сувдан оқилона фойдаланиш ва электр энергиясини тежаш мақсадида қабул қилинди.
“Битта чироқ ҳеч нимани билдирмайди, бироқ мамлакатда миллионлаб чироқ бор. Натижада яхшигина миқдор ҳосил бўлади. Қаранглар, кафеларда кечқурун юзталаб чироқ ёниқ туради”, – деди Миллий энергохолдинг раҳбари Талайбек Байгазиев.
Барча тақсимот компанияларига кечқурун ва эрталаб рейдлар ўтказиш учун билдирги юборилди. Улар ёритишдан фойдаланилмаётганини текшириши керак.
Токтогул сув омборида сув камайиб кетгани сабабли Қирғизистон 1 октябрдан эътиборан Тожикистондан электр сотиб ола бошлади.
