Марказий банк 9та банкка нисбатан жарима санкциясини қўллади

Апрель ойида Марказий банк 9та банкка нисбатан жарима санкциясини қўллади. Бу ҳақда регулятор матбуот хизмати хабар берди.

Банк назорати қўмитаси томонидан ўтган ойидаги йиғилишларда 49та масала кўрилиб, тегишли қарорлар қабул қилинди. Хусусан, ўтган ойда рўйхатга олиш ва рухсат бериш йўналишида 34та масала кўриб чиқилди.

Улардан 9таси кредит ташкилотлари уставига киритилган ўзгартиришларни рўйхатдан ўтказиш, 3таси кредит ташкилотларининг устав фондидаги улушига эгалик қилиш учун рухсат бериш ҳамда 1таси кредит ташкилотларини лицензиялаш кабилар борасида бўлган.

Кредит ташкилотларининг молиявий ҳолати бўйича банклар ва тўлов ташкилотлари томонидан Марказий банк талабларининг бажарилиши, банклар ва микромолия ташкилотларида ўтказилган ўрганишлар натижалари муҳокама қилинди.

Ўтказилган ўрганишлар натижасида аниқланган қоидабузарликлар учун 16та банк ва 2та микромолия ташкилоти чора ва санкциялар қўлланилиши тўғрисида огоҳлантирилди.

Амалдаги қонунчилик ва Марказий банк талабларига риоя қилинмаганлиги ва аниқланган қоидабузарликлар учун 9та банкка нисбатан жарима санкциялари қўлланилди.

Аниқланган камчиликларни тузатиш, тегишли чораларни кўриш, ўрнатилган пруденциал нормативларга амал қилиш, банк фаолиятида мавжуд заифликларни бартараф этиш ва молиявий ҳолатини соғломлаштириш бўйича тегишли кўрсатмалар берилди.