Қашқадарёда “GTL” заводида ишчилар оммавий тартибсизлик келтириб чиқарди. Энергетика вазирлиги воқеага ойдинлик киритди
Бугун, 21 октябрь куни ижтимоий тармоқларда “Enter Engineering” компанияси ишчилари намойишлари акс этган видео тарқалди.
Видеоларда хизмат кийимидаги юзлаб ишчилар завод ҳудуди бўйлаб ҳаракатланиши, норозиликларини турли шаклларда ифода қилишини кўриш мумкин.
Видеолардан бирида завод ҳудудида ёнғин чиққани ва осмонга қора тутун кўтарилгани акс этган.
Таъкидланишича, Қашқадарё вилояти Ғузор туманидаги объектларидан бирида ишчи норозилик намойишини уюштириб, компания мулкига зарар етказган.
Энергетика вазирлиги матбуот хизмати хабарига кўра, ҳодиса 21 октябрь куни эрталаб соат 7:30да ишчилар учун мўлжалланган ошхонадаги моноблок тизимидаги (электрон кириш тизими) техник носозлик содир бўлган. Оқибатда улар кундалик овқатланишга кира олмаган. Бу эса катта норозиликни келтириб чиқарган.
Хабарда ёзилишича, айни пайтда техник ходимлар ишчи гуруҳи моноблок тизимидаги носозликни тузатмоқда.
“Энергетика вазирлиги, “Ўзбекнефтгаз” АЖ, “Enter Engineering Pte. Ltd” раҳбарияти тафсилотларини билиш ва келажакда шунга ўхшаш ҳодисаларнинг олдини олиш учун воқеа жойига учиб кетди”, - дейилган хабарда.
