Москва вилоятидаги ёнғинда 6 нафар ўзбекистонлик ҳалок бўлди
Москва вилоятидаги Раменское туманида 5 майга ўтар кечаси электр симларининг носозлиги сабабли муҳожирлар ётоқхонаси ёниб кетди. Кўнгилсиз ҳодиса оқибатида олти нафар ўзбекистонлик ҳалок бўлди, қолган фуқаролар омон қолган. Бу ҳақда «Московский комсомолец» хабар берди.
Дурниха қишлоғида ёниб кетган икки қаватли уй (майдони 200 метр) илгари маҳаллий аҳоли вакилига тегишли бўлган, аммо бундан бир неча йил олдин уй мигрантлар учун ётоқхона барпо этган тадбиркорга сотилган. Бундан ташқари, мигрантлар учун бир нечта яшаш вагонлари ер майдонининг ўзида ўрнатилган. Гувоҳларнинг таъкидлашича, ётоқхонада ҳаммаси бўлиб элликка яқин одам бўлган. Сўнгги вақтларда изоляция туфайли мигрантлар уйни деярли тарк этмаган.
Ёнғин ҳақида маълумот фавқулодда хизматларга соат 04:21 да келиб тушган. Дастлаб Фавқулодда вазиятлар вазирлиги ходимлари, кейин шифокорлар воқеа жойига етиб борган. Ёғочдан қурилган иккинчи қават бутунлай ёниб кетган. Уч нафар эркак ва уч нафар аёл вафот этган: улар биринчи қаватга қулаб тушган. Аниқланишича, ҳалок бўлганлар Ўзбекистон фуқаролари бўлиб, уларнинг ёши тахминан 30 лар атрофида бўлгани айтилмоқда.
Ҳозирда терговчилар мигрантларнинг Россия ҳудудида бўлгани қонунийлигини текширмоқда. Бундан ташқари, терговчилар уй эгасини сўроқ қилади.
Уй электр ускуналар ёрдамида иситилган, шунинг учун содир бўлган ҳодисанинг асосий версияси — симлардаги қисқа туташув. Ҳалок бўлганларнинг шахси аниқланмоқда. Ҳодиса юзасидан жиноий иш қўзғатилган.
