Ҳумоюн Султонов ярим финалда

Бельгиянинг Дюффел шаҳрида теннис бўйича эркаклар ўртасида ўтаётган M25 тоифасидаги «Gonzalez Academy event» халқаро турнири ўзининг қизғин палласига кирди.

Мусобақанинг яккалик баҳслари чорак финалида иштирок этаётган теннисчимиз Ҳумоюн Султонов турнирда иккинчи рақам остида сараланди ва 1/4 финал босқичида бельгиялик Байи Жил Арнони 6:3, 4:6, 6:4 ҳисобида мағлубиятга учратди.

Энди мамлакатимизнинг биринчи рақамли теннисчиси Ҳумоюн Султонов финал йўлланмаси учун ўтадиган ўйинда финляндиялик Эро Васа билан куч синашади.

Эслатиб ўтамиз, Германияда ўтказилаётган M15 таснифидаги «Saarland Open – 2024» мусобақасида мамлакатимиз шарафини ҳимоя қилган Сергей Фомин ўз иштирокини чорак финалда тўхтатди.