Германия полицияси Исроилнинг Ғазо секторидаги агрессиясига қарши намойишни тарқатиш учун куч ишлатди
Германия полицияси Исроилнинг Ғазо секторидаги агрессиясига қарши намойишни тарқатиш учун куч ишлатди.
Митинг иштирокчилари Германия канцлери идораси ёнида тўпланишди.
Ижтимоий тармоқларда эълон қилинган суратларда ҳуқуқ-тартибот идоралари ходимлари намойишчиларни тарқатиш ва ҳибсга олишда ўта қўпол ҳаракат қилганини кўриш мумкин. Полиция намойишчиларни муштлари билан калтаклаган, бўғиб қўйган, шунингдек, кўздан ёш оқизувчи газ пуркаган.
Аввалроқ Берлин полицияси «Фаластин конгресси» деб номланган митингни тўхтатиб, уни кейинги ўтказишни тақиқлаган эди. Полиция тадбир ўтказилган залда электр энергиясини узиб қўйган.
Бундан ташқари, Германия Ички ишлар вазирлиги Грециянинг собиқ молия вазири Янис Варуфакиснинг Фаластинни қўллаб-қувватловчи баёнотлари туфайли Германиядаги сиёсий фаолиятда қатнашишни тақиқлади.
