Фарғоналик эркак иссиқхона қураман деб пулларидан айрилди

Фарғона вилоятининг Учкўприк туманида яшовчи фуқаро Х.О. жорий йилнинг сентябрь ойида исссиқхона қуриш ниятида юрганида, ўзи яхши танимайдиган шахс ишончига кириб, алдаб кетди. У 14 миллион 500 минг сўм пул эвазига иссиқхона қуриб беришга ваъда бериб, олдиндан пулни олди-ю, қорасини кўрсатмади.

Декабрь ойигача кутиб, тоқати тоқ бўлган жабрланувчи охири ёрдам сўраб туман ИИБга мурожат қилди. Унинг аризасига асосан мазкур ҳолат юзасидан Учкўприк тумани ИИБ ҳузуридаги тергов бўлими томонидан жиноят иши қўзғатилди.

Фарғона вилояти ИИБ Ахборот хизматининг маълум қилишича, олиб борилган тезкор қидирув ҳаракатлари давомида ушбу жиноятни содир этган Ж.А. процессуал тартибда ушланган.