АҚШ афғон техникаларини Ўзбекистонга беришга ҳақли эмас
Афғонистон Мудофаа вазирлиги АҚШнинг Ўзбекистондаги элчиси Жонатан Хеникнинг баёнотига шундай муносабат билдирди. Баёнотда Америка афғон халқининг мулкини тасарруф қилишга ҳақли эмаслиги таъкидланган.
Расмий Тошкентдан эса "доно қарор" қабул қилиши ва техникаларни Афғонистонга қайтаришда ёрдам бериши кутилаётгани айтилган, деб ёзади @sputnikaf.
Элчи Хеник ўзбек нашрига берган интервьюсида 2021 йилда афғон ҳарбийлари Ўзбекистонга олиб ўтган техникалар мамлакатда қолиши бўйича келишувга эришилганини маълум қилганди.
Маълумот ўрнида, 2021 йилда "Толибон" қайтадан ҳокимиятга келганида афғон учувчилари самолёт ва вертолётларда Ўзбекистон ва Тожикистонга қочганди. Хусусан, Ўзбекистонга 22 та "Embraer EMB 314 Super Tucano" ва "Pilatus PC-12" русумли самолётлар ва 24 та "UH-60 Black Hawk", "MD-530" ва "Mi-17" русумли вертолётлар олиб ўтилган.
