“Zakovat” o‘yini g‘oliblari OTMga imtihonsiz kirishadi

Intellektual o‘yinlar, jumladan, “Zakovat” umumiy o‘rta ta’lim maktablari, prezident ta’lim muassasalari, o‘rta maxsus va professional ta’lim muassasalari hamda oliy ta’lim muassasalari, shuningdek, ko‘ngilli jamoalar o‘rtasida tizimli ravishda o‘tkazib boriladi. Bu O‘zbekiston prezidenti imzolagan tegishli qarorda belgilab qo‘yilgan.
Tashkiliy qo‘mita tavsiyasiga ko‘ra intellektual o‘yinlarning respublika bosqichi g‘oliblari va sovrindori (1-3-o‘rinlar) o‘rta maxsus va professional ta’lim muassasalari va oliy ta’lim muassasalariga bazaviy to‘lov kontrakt asosida imtihonlarsiz qabul qilinadi. G‘olib amaldagi talabalar esa xuddi shartlarda OTMdagi ta’limning keyingi bosqichiga o‘tishlari mumkin.

2022/2023 o‘quv yilidan boshlab intellektual o‘yinlarning respublika bosqichida g‘olib bo‘lgan o‘quvchi yoshlar va talabalar uchun “Zakovat” stipendiyasi ta’sis etiladi. U yil davomida har oyda beriladi.
Ta’lim muassasalarida tashkil etilgan “Zakovat” intellektual klublarining koordinatori bo‘lgan professor-o‘qituvchilarga direktor jamg‘armasi hamda oliy ta’lim muassasalarining byudjetdan tashqari jamg‘armalari hisobidan bir oylik mehnatga haq to‘lash fondining 50 foizi miqdorida bir martalik ustama to‘lab beriladi.

Mamlakatda intellektual o‘yinlarni yanada rivojlantirish maqsadida Davlat byudjetidan “Zakovat” intellektual klubi” nodavlat notijorat tashkilotiga 2022 yilda 50 milliard so‘m mablag‘ ajratiladi.
Mazkur mablag‘lar intellektual o‘yinlarni tashkil etish, savol yo‘llagan teletomoshabinlarni moddiy rag‘batlantirish, ekspertlar va hakamlarga ish haqi to‘lash, “Zakovat” intellektual klubi a’zolari uchun ochiq ro‘yxatdan o‘tish elektron platformasini yaratish va uni yuritish hamda g‘olib bo‘lgan jamoalar a’zolarini rag‘batlantirishga yo‘naltiriladi.

Davlat xizmatini rivojlantirish agentligi Intellektual olimpiada g‘olib va sovrindorlarini o‘z mutaxassisligi bo‘yicha kadrlar zaxirasiga olish amaliyotini yo‘lga qo‘yadi.
2022/2023 o‘quv yilidan boshlab har yili aprel oyida “Intellektual haftalik” tadbirini tizimli ravishda o‘tkaziladi.