BMT islohotga muhtoj

Birlashgan Millatlar Tashkilotining sobiq Bosh kotibi Pan Gi Mun Xavfsizlik kengashida "Tinchlik yo‘lida yetakchilik: BMT yetakchiligining kelajagi" mavzusidagi ochiq debatda nutq so‘zladi.

AQSh hisobot byurosiga ko‘ra, u BMT Xavfsizlik kengashini isloh qilish va Bosh kotib rolini kuchaytirishga chaqirgan.

Mun so‘nggi yillarda global vaziyatning beqarorlashgani, xususan, Rossiyaning Ukrainaga keng ko‘lamli bostirib kirishi, G‘azo sektoridagi mojaro, mojarolar tufayli tinch aholi qurbonlari soni ortib borayotgani va iqlim inqirozini tilga oldi. Uning ta’kidlashicha, bu omillarning barchasi xalqaro hamkorlikni murakkablashtirib, BMT doirasida inqirozga olib kelgan.

Pan Gi Mun global tashkilotning kuchi va samaradorligi bevosita a’zo davlatlarning siyosiy irodasiga bog‘liqligini ta’kidladi. Uning ta’kidlashicha, mavjud muammolarni bartaraf etish uchun tub islohotlar zarur: "Agar islohotlar amalga oshirilmasa, BMT qulashi mumkin".

Uning qayd etishicha, tashkilot rahbariyati, xususan, Bosh kotib xalqaro diplomatiyada faolroq siyosiy rol o‘ynashi kerak. Pan Gi Mun tashkilotning navbatdagi rahbariga besh emas, yetti yillik mandat berishni taklif qilib, bu uning Xavfsizlik Kengashining doimiy a’zolariga qaramligini kamaytirishi mumkinligini aytdi.

BMT inqirozining asl sababi sifatida Xavfsizlik Kengashining kamchiliklarini tilga olgan Pan Gi Mun veto huquqini suiiste’mol qilish tinchlik va xavfsizlikni ta’minlash mandatini zaiflashtirayotganini ta’kidladi. U vetoni cheklash muhimligini ta’kidlab, Xavfsizlik kengashini XXI asr voqeliklariga mos ravishda isloh qilishga chaqirdi.