«Tungi bosqinchilar»ga chiqarilgan sud hukmi o‘zgarishsiz qoldirildi

Qoraqalpog‘iston Respublikasi sudining jinoyat ishlari bo‘yicha sudlov hay’ati, sudlanuvchilar SH.A., O.B., N.B., va A.J.larga nisbatan chiqarilgan jinoyat ishlari bo‘yicha Nukus shahar sudining 2021 yil 21 sentyabrdagi hukmi ustidan sudlanuvchi SH.A. O.B. va ularning himoyachilari tomonidan berilgan shikoyatlariga asosan, jinoyat ishining sudlanuvchilar SH.A. va O.B.larga oid qismini ochiq sud majlisida, apellyasiya tartibida ko‘rib chiqdi.

Sudning hukmi bilan 1996 yili Samarqand viloyati Urgut tumanida tug‘ilgan SH.A., ushbu tumanda 1999 yil tug‘ilgan O.B.lar O‘zbekiston Respublikasi Jinoyat kodeksi 164-moddasi 3-qismining “v” bandi bilan JKning 57-moddasini qo‘llanilgan holda 6 (olti) yil muddatga ozodlikdan mahrum qilish jazosi tayinlanib, tayinlangan jazoni umumiy tartibli koloniyada o‘tash belgilangan, jazoni o‘tash muddati 2021 yil 20 martdan boshlab hisoblangan va qamoqqa olish tarzidagi ehtiyot chorasi o‘zgarishsiz qoldirilgan. Jinoyat ishi bo‘yicha yetkazilgan 58.523.560 so‘m moddiy zarar to‘liq qoplangani hisobga olingan.

Sud hukmiga ko‘ra, sudlanuvchi SH.A. jinoiy yo‘l bilan pul topish ilinjida, tanishlari SH.SH., B.A., va N.B. bilan oldindan til biriktirib, bir guruhga birlashib, Nukus shahar 22 kichik tumanida yashovchi I.K.ning xonadonidan pul mablag‘i va mol mulkini bosqinchilik yo‘li bilan o‘zlashtirish haqidagi o‘zaro jinoiy reja tuzib, jinoiy rejalarini amalga oshirish maqsadida guruh a’zolari bilan o‘zaro vazifalar taqsimlagan.

Shu tariqa, 2021 yil 7 mart kuni soat 21:00 da SH.A.ning jinoiy sherigi N.B. fuqaro M.K.ni bayram munosabati bilan ziyofat qilish bahonasida Nukus shahrida joylashgan “NEO” restoraniga taklif qiladi. Ular restoranda birga ovqatlanib, spirtli ichimliklar iste’mol qilib o‘tirganida soat 00:30 larda M.K.ning tanishlari U.YU. va Q.A.lar kutilmaganda ularning rejasiga zid ravishda N.B., A.J. va M.K.lar o‘tirgan stolga kelib o‘tirgandan so‘ng oradan ozgina vaqt o‘tib, K.A. bilan A.J.lar o‘rtasida o‘zaro kelishmovchilik kelib chiqadi. Shu tariqa M.K. tanishlari K.A. va U.YU.lar bilan birga restorandan chiqib ketganidan so‘ng N.B. jinoiy sherigiga qo‘ng‘iroq qilib, M.K.ning restorandan ketib qolganligini, reja o‘xshamaganligi aytganida, unga M.K.ning qayerga ketganligini bilish lozimligini, reja amalga oshirilmagunga qadar bir amallab uni uyiga yubormasdan ushlab turish lozimligini aytgan.

So‘ng, N.B. M.K.ning qayerdaligini bilish maqsadida unga qo‘ng‘iroq qilganiga qaramasdan, uning qo‘ng‘iroqlariga javob bermaganidan keyin jinoiy guruh a’zolarining hammasi “NEO” restorani oldiga yig‘ilib, SH.SH. boshqaruvidagi fuqaro D.SH.ning nomidagi davlat raqam belgisi 01 O 219 GB bo‘lgan COBALT rusumli avtomashinada M.K. qaytib bormasidan avval uning uyiga borib, moddiy qimmatliklarni olib chiqish kerakligini kelishib oladi. Soat 03:30 larda M.K.ning uyi tomonga borib, SH.SH. o‘zining oldindan tayyorlab qo‘yilgan niqob (maska) larni yonidagi sheriklari O.B. va SH.A.larga berib, uzlari Nukus shahar “Broyller” blok posti tomonida kutib turishini aytib, u yerdan ketgan.

SH.Ashurov va O.B,lar spirtli ichimlik ichgan, mast holatda qora va qizil rangli matoli bosh kiyimdan yasalgan niqoblarni yuzlariga taqib, eshikni taqillatishadi va M.K.ning 2009 yil tug‘ilgan voyaga yetmagan qizi va 2013 yil tug‘ilgan voyaga yetmagan o‘g‘liga “onang pissa berib yubordi” deb aytib, ularni aldab, uyning kirish eshigini ochdirishga erishib, uyga g‘ayriqonuniy ravishda kirgan. Yuziga niqob taqqan shaxslarni ko‘rgan qizi qo‘rqib ketib, baqirib yuborganida O.B. voyaga yetmagan qizning hayoti uchun xavfli bo‘lgan usulda qo‘llari bilan uning og‘zini bosib, agar yana baqirsa o‘ldirishini aytadi., SH.A. bilan xonadon ichkarisiga kirib, M.K.ga tegishli bir dona bahosi 500000 so‘m bo‘lgan “Samsung J2” rusumli va bir dona bahosi 300000 so‘m bo‘lgan “Samsung C3 mini” rusumli telefon apparatlarini, bir juft qiymati 1000 AQSh dollar bo‘lgan brilliant qoshli tilla ziragini hamda bir dona qiymati 500 AQSh dollar bo‘lgan brilliant qoshli uzugini jami 2500 AQSh dollari (2021 yil 8 mart holatiga ko‘ra 1 AQSh dollarining so‘mdagi qiymati 10517,12 so‘mga teng bo‘lib, 2.500 x 10517,12 = 26,292,800 so‘m) ashyolarini bosqinchilik yo‘li bilan talon-taroj qilib, SH.Sharopovning boshqaruvidagi davlat raqam belgisi 01O 219GB bo‘lgan COBALT rusumli avtomashinada voqea joyidan yashiringan.

Yuqoridagilarga asosan, sudlanuvchilar SH.A. va O.B. o‘zlarining jinoiy harakatlari bilan O‘zbekiston Respublikasi JKning 164-moddasi 3-qismining “v” bandida ko‘rsatilgan jinoyatni qastdan sodir qilishgan.

O‘zbekiston Respublikasi Oliy sudi Plenumining 2006 yil 3 fevraldagi “Sudlar tomonidan jinoyat uchun jazo tayinlash amaliyoti to‘g‘risida”gi 1-sonli qarorining 1-bandida “Sudlarning e’tibori, jinoyat uchun jazo chorasini tayinlashda qonuniylik, insonparvarlik, odillik va javobgarchilikning muharrarligi tamoillariga qat’iy amal qilishga qaratilishi lozimi”ligi, mazkur Qarorning 3-bandiga muvofiq JKning 8,54-moddalari mazmuniga ko‘ra, jazo odil bo‘lishi, har bir holatda individual tayinlanishi, jinoyatning xususiyati va ijtimoiy xavflilik darajasiga, aybdorning shaxsiga, shuningdek, jazoni yengillashtiruvchi va og‘irlashtiruvchi holatga muvofiq bo‘lishi kerakligi tushuntirilgan.

Yuqoridagilarga asosan sudlov hay’ati, birinchi instansiya sudi tomonidan sudlanuvchilar SH.A. va O.B.larga jazo tayinlashda, jinoyatning holatini va ijtimoiy xavflilik darajasini, ya’ni o‘ta og‘ir jinoyatlar turkumiga kirishini, qilmishning sabablari va oqibatlarini, ularning shaxslarini, jazoni yengillashtiruvchi va og‘irlashtiruvchi holatlarini e’tiborga olib, JKning 57-moddasini qo‘llagan holda modda sanksiyasining minimal miqdoridan ham kam miqdorida ozodlikdan mahrum qilish jazosini tayinlash to‘g‘risida to‘g‘ri qaror qabul qilingan.

O‘zbekiston Respublikasi Jinoyat-prosessual kodeksi 497 ^{13, 17, 26, 31, 34, 36}-moddalariga amal qilib, sudlov hay’ati Jinoyat ishlari bo‘yicha Nukus shahar sudining SH.A., O.B., N.B. va A.J.larga nisbatan chiqarilgan 2021 yil 21 sentyabrdagi hukmining SH.A., va O.B.larga oid qismi o‘zgarishsiz qoldirildi

T.TURDIMURATOV,

Qoraqalpog‘iston Respublikasi jinoyat ishlari bo‘yicha

sudlov hay’ati sudyasi.

Qoraqalpog‘iston axborot agentligi.