"Toshkentga kelib, fohishalik qilishga majbur bo‘ldim": IIB xodimiga pora taklif qilgan ayolga hukm o‘qildi

“Og‘zi kuygan qatiqni ham puflab ichadi”, deyishadi. Biroq “qahramoni”miz ayol nomiga dog‘ tushiradigan “hunar” bilan qo‘lga tusha turib, fikr qilish va o‘ziga tegishli xulosa chiqarish o‘rniga yana bir jinoyatga qo‘l uradi...

Jinoyat ishlari bo‘yicha Chilonzor tuman sudining ochiq sud majlisida 23 yoshli ayolga nisbatan ko‘rilgan jinoyat ishining ish hujjatlariga ko‘ra, u Toshkent shahar, Chilonzor tumanidagi Toshkent shahar IIBB PPXB binosi oldida Mirobod tumani IIO FMB 1-sonli IIB XPB profilaktika inspektoriga qonunga xilof ekanligini bila turib, unga pora taklif qiladi. Gap shundaki, shu kuni Toshkent shahar IIBB tomonidan o‘tkazilgan “Oriyat” tadbiri davomida ayolning fohishalik bilan shug‘ullanganligi aniqlangan. Mazkur holat bo‘yicha belgilangan tartibda hujjatlarni rasmiylashtirmaslik evaziga 200 AQSh dollarini pora tariqasida bergan vaqtida Bosh prokuratura huzuridagi iqtisodiy jinoyatlarga qarshi kurashish Departamentining Chilonzor tuman bo‘limi va Toshkent shahar IIBB xodimlari tomonidan ashyoviy dalillar bilan ushlangan.

Sud majlisida sudlanuvchi aybiga iqror bo‘ldi. Ayolning so‘zlariga ko‘ra, 2021 yilda Toshkent shahriga ayollar salonida ishlash maqsadida kelgan. Lekin ish topa olmagach, “SPA” salonda ishlagan.

— Boshqa ish topa olmagach, fohishalik bilan shug‘ullanishga majbur bo‘ldim. Shu ish bilan mijoz topish orqali shug‘ullanganman. O‘sha kuni tungi soat 01:00 larda 4 nafar dugonalarim bilan foxishalik bilan shug‘ullanish uchun bir restoran yoniga bordik. Oradan bir yarim soat o‘tgach, “Kaptiva” rusumli avtomashinada ikki nafar yigit keldi. Dugonam bilan mashinadan tashqarida gaplashishdi va undan “dam olishga qizlar bormi?” deb so‘rashdi. Yigitlar hammamizni biz o‘tirgan mashinadan tushishimizni so‘radi. Men va yana mashinada bo‘lgan uch nafar dugonam mashinadan tushdik. Yigitlar bizni ko‘rganidan so‘ng, dugonam bilan savdolashishdi. Dugonam “xizmat” xaqi 800 000 so‘m bo‘lishini aytdi, yigitlar rozi bo‘lishdi. Shu payt yonimizga bir nechta IIB xodimlari kelib, o‘z xizmat guvoxnomalarini ko‘rsatishdi. “Oriyat tadbiri” o‘tkazilayotganligini aytib, bizni va avtomashina egasini Toshkent shahar IIB PPX brigadasiga olib borishdi, - deydi sudlanuvchi ayol.

Shu yerda profilaktika inspektori qizlar bilan, shu jumladan sudlanuvchi bilan ham suhbatlashib, Ma’muriy javobgarlik to‘g‘risidagi kodeksning 190-moddasida nazarda tutilgan huquqbuzarlikni sodir etganlari yuzasidan ma’muriy huquqbuzarlik to‘g‘risidagi bayonnoma rasmiylashtirishni aytgan. Holat yuzasidan tushuntirish xati yozib berishni ham so‘ragan. Shu payt sudlanuvchi tuman IIBdagi profilaktika inspektorini ko‘rib qoladi. Uning galdagi jinoyatni sodir qilishiga ayni shu holati sabab bo‘ladi.

— U inspektor oldin menga ayni shu modda bilan ma’muriy bayonnoma rasmiylashtirgandi. Shu sababli uni tanib qolib, unga murojaat qildim. Unga bo‘lib o‘tgan holatni gapirib berdim va yonimdagi bor pulimni berishimni, faqat bu yerdan chiqarib berishini so‘radim. Oradan biroz vaqt o‘tgach, inspektor yonimga kelib, “gaplashdim, profilaktika inspektori ertalab chiqarib ketadi”, dedi. Keyin u oldimga kelib, tushuntirish xati yozib berishimni, ertalab chiqarib yuborishini aytdi. Yozdim va profilaktika inspektori bizga nisbatan ma’muriy bayonnoma rasmiylashtirishni boshladi. Menga nisbatan ma’muriy bayonnoma rasmiylashtirmasligini, ishni sudga oshirmaslikni iltimos qildim. “Nima sabab?”, deb so‘radi. Ota-onam xasta ekanini va ushbu holat bo‘yicha ular istiqomat qiluvchi manzilga bu haqda ma’lumot borsa, ularning axvoli og‘irlashishi mumkinligini bildirdim. Profilaktika inspektoridan qo‘yib yuborishini so‘raganimda, “Hujjat rasmiylashtirmasdan chiqarib yuborsam, qancha bera olasiz?” deb so‘radi. Yonimda 200 AQSh dollari borligini aytdim, rozi bo‘ldi. Keyinroq gaplashishni aytib, chiqib ketdi. Oradan biroz vaqt o‘tib, biz saqlanayotgan Toshkent shahar IIBB PPX brigadasining binosiga profilaktika inspektori kirib keldi va hamkasbidan meni chiqarib yuborishini so‘radi, ular pul oldi-berdisi haqida gaplashib qolishdi. Xullas, inspektor avval pul berilmasa chiqarmasligini bildirdi. Cho‘ntagiga 200 AQSh dollarini solganimdan so‘ng, meni va inspektorning yoniga notanish bo‘lgan bir guruh shaxslar video kamera yoqqan holda kelishdi. O‘z xizmat guvoxnomalarini ko‘rsatishib, o‘zlarini IJQK Departamentning Chilonzor tuman bo‘limi xodimlari va IIB xodimlari bilan birgalikda tezkor tadbir o‘tkazilayotganligini aytishdi. Mendan nima sababdan profilaktika inspektoriga 200 AQSh dollarini berganimni so‘rashdi. Ma’muriy bayonnoma rasmiylashtirmaslik va ishni sudga oshirmaslik, qo‘yib yuborishlari uchun pul berganimni aytdim... - deydi qilgan ishidan pushaymonligini qo‘shib o‘tgan sudlanuvchi.

Sudlanuvchi aybiga iqror bo‘lgan bo‘lsa-da uning aybi, dalillar bilan ham isbotlandi.

SUD HUKM QILDI...

Sudlanuvchi Jinoyat kodeksining 211-moddasi (pora berish) 1-qismida nazarda tutilgan jinoyatni sodir etganlikda aybli deb topildi va 13 500 000 so‘m jarima jazosi tayinlandi.

Ja’far KURBANOV,

jinoyat ishlari bo‘yicha Chilonzor tuman sudi sudyasi