Toshkentdagi mehmonxonalardan birida o‘g‘irlik qilgan erkak ozodlikdan mahrum qilindi

Ba’zilarning hayot yo‘llarini kuzata turib, o‘yga tolasan kishi. Qonunni chetlab o‘tib, qing‘ir yo‘llar orqali daromad topish ortidan takror va takror sudning qora kursisidan joy olish va jazoga tortilish jarayonida aqalli bir marta bo‘lsa ham ortga nazar tashlab, “umrimning qanchasi panjara ortida jazoni o‘tash bilan o‘tdi, uni behuda sarf qilmayapmanmikan?” degan savolni o‘ziga berib ko‘rmasa?! 39 yoshli erkak ham xuddi shu toifadan. Bir necha bor firibgarlik, o‘g‘rilik jinoyatlarini sodir qilib, tegishli jazo olgan bo‘lishiga qaramay, yana shu “yo‘l” orqali mablag‘ topishga urindi.

U muqaddam sodir qilgan o‘g‘irlik jinoyati uchun tergov harakatlariga jalb qilindi. Toshkentdagi mehmonxonalardan birida o‘zi bilan birga vaqtincha yashab kelgan sherigi – jabrlanuvchining yuvinish xonasiga kirganidan, shaxsiy buyumlari qarovsiz qolganidan foydalanadi. Jabrlanuvchiga tegishli, bahosi 150.000 so‘mlik erkaklar barsetkasi, uning ichida bo‘lgan 750.000 so‘m naqd pul, hisobida 6.900.000 so‘m mablag‘lar mavjud bo‘lgan ikki dona bank plastik kartalari, bahosi 50.000 so‘mlik flesh-kartasi, fuqarolik pasportini yashirin o‘g‘irlab, voqea joyidan yashirinadi. Sherigiga jami 7.850.000 so‘mlik moddiy zarar yetkazib, fuqarolik pasportini nobud qilgan.

“JINOYATNI PULGA MUHTOJ BO‘LGANIM SABABLI SODIR QILDIM”

Sud majlisida sudlanuvchi aybiga to‘liq iqrorligini bildirdi...

— Toshkent shahriga shaxsiy ishlarim bilan borgandim. Vaqtincha yashash uchun mehmonxonalardan biriga joylashdim. Men joylashgan xonada avvalroq kelgan fuqaro bor edi. U bilan o‘zaro tanishib, birgalikda ovqatlanib, muloqotda bo‘ldik. Uchinchi kuni uyg‘onib, yuvinib chiqdim. So‘ng xonadoshim ham yuvinish xonasiga kirib ketdi. Shunda uning pullarini o‘g‘irlash fikri paydo bo‘ldi. Unga tegishli bo‘lgan erkaklar barsetkasini olib, mehmonxonadan chiqib ketdim. Metro bekati yoniga borib, barsetkani ochib ko‘rganimda ichida naqd pullar, ikki dona bank plastik kartalari, fuqarolik pasporti borligini ko‘rdim. U bilan ovqatlangani chiqqanimizda bank plastik kartasining pin-kodini eshitib olgandim. Bankomat orqali uning hisobidan 6.600.000 so‘m mablag‘ni yechib oldim. O‘z ishlarim bilan vodiyga ketdim. Dovonda barsetkani ichida bo‘lgan fuqarolik pasporti hamda plastik kartalarini otib yubordim. Barsetka ichida flesh-kartani ko‘rmagandim. Hozirda sodir qilgan jinoyatim oqibatlarini tushunib yetib va bundan pushaymonman. Mazkur jinoyatni pulga muhtoj bo‘lganim sababli sodir qilishga majbur bo‘ldim.

“10.000.000 SO‘M MODDIY VA MA’NAVIY ZARAR UNDIRISHNI SO‘RAYMAN”

Sud majlisida jabrlanuvchi quyidagilarni bayon qildi...

— Malaka oshirish uchun Toshkent shahriga kelib, mehmonxonaga joylashdim. Xona ikki kishilik bo‘lib, keyinchalik shaxsini bilganim – xonadoshim ham xonaga joylashdi. U bilan o‘zaro tanishib, birga ovqatlanish uchun chiqib, muloqotda bo‘ldik. O‘sha kuni uyqudan uyg‘onib, yuvinish xonasiga kirib ketdim. Xonaga qaytib kelganimda, uning chiqib ketganini bildim. So‘ng o‘zim ham xonadan chiqib ketishga hozirlanib, javonga qo‘yganim – ichida fuqarolik pasportim, 750.000 so‘m naqd pul, hisobimda 6.900.000 so‘m mablag‘lar bo‘lgan bank plastik kartasi, flesh-kartasi bo‘lgan bahosi 150.000 so‘mlik barsetkamni olmoqchi bo‘ldim. Barsetkam joyida yo‘qligini bildim va darhol mehmonxona ma’uriyatiga narsalarim yo‘qolganini aytdim. Ashyolarimni xonada birga yashagan xonadoshim o‘g‘irlagan bo‘lishi mumkinligini ham qo‘shib qo‘ydim. Mehmonxona ma’muriyati uning sumkasi mehmonxonada qolganini va qaytib kelishi mumkinligini aytib, uni kutishni taklif qilishdi. Shundan so‘ng plastik kartam qoldig‘ini ko‘rganimda, hisobimda 55.000 so‘m qolganini ko‘rib, holat yuzasidan ichki ishlar idoralariga xabar berdim. Hozirda menga yetkazilgan moddiy zarar o‘rni umuman qoplanmagan, fuqarolik pasportim ham qaytarilmagan, sudlanuvchidan foydamga 10.000.000 so‘m moddiy va ma’naviy zararni undirib va unga qonunda nazarda tutilgan jazo tayinlashni so‘rayman.

HUKM O‘QILDI

Cudlanuvchi JK 169-moddasi 3-qismining “a” bandi, 227-moddasi 2-qismining “a” bandida nazarda tutilgan jinoyatlarni sodir etganlikda aybli deb topildi.

JKning 59-moddasi 8-qismi tartibida sudlanuvchi 2020 yildagi hukm bilan tayinlangan 3 yil 6 oy muddatga ozodlikdan mahrum qilish jazosini qisman qo‘shish yo‘li bilan uzil-kesil 5 yil 6 oy muddatga ozodlikdan mahrum qilish jazosi tayinlandi. Jazoni qattiq tartibli koloniyada o‘tash belgilandi.

Sudlanuvchidan jabrlanuvchiga 10.000.000 so‘m moddiy va ma’naviy zarar undirilishi belgilandi.

Ilgizar Sabirov, jinoyat ishlari bo‘yicha Chilonzor tuman sudi raisi