Suv ichishdagi sunnatlar qanday?

1. Suv piyola kabi idishga alohida quyilib, Bismillah deb ichiladi;

2. Suvni tik turib yoki yotib ichishlik odobsizlikdir;

3. Suv ichishni boshlamasdan avval suv quyilgan idishni tekshirib qo‘yishlik (chekkasi uchmaganmi, ichida nimadir qolmaganmi deya);

4. Suvni ichayotganida oqizmasdan, tomizmasdan ichiladi;

5. Suv ichayotganda nafas olmasdan, suvni chayqalamasdan ichishga e’tibor berishlik;

6. Suvni 3 martada bo‘lib-bo‘lib ichishlik: birinchisida oz, ikkinchisida o‘rtacha va uchinchisida qanoat qilgudek darajada ichiladi.

7. Suv ichib bo‘lgach "Alhamdulillah" demoqlik. Yana ham afzali: suvni birinchi marta bo‘lib ichganida "Alhamdulillah" demoqlik, ikkinchi marta bo‘lganida "Alhamdulillahi Robbil ’alamin" demoqlik, uchinchi martasida esa "Alhamdulillahi Robbil ’alamin, ar-rohmanir rohim" deyishlikdir.

Sunnatga ko‘ra suv ichmoqlik...

Huzur qilib suv ichar ekanmiz, suv ichish sunnatlarini bilib qo‘yishimiz muhim. 

Savol: "Suv ichishdagi sunnatlar qanday? Ba’zilar tik turib ichilgan suvni tezda chiqarish kerak, unda yaxshilik yo‘q,- deyishadi. Bu to‘g‘rimi?"

Javob: Yegan va ichganlarimizda e’tibor qilishimiz kerak bo‘lgan eng muhim jihat - uning halol bo‘lishidir. Mabodo, Alloh asrasin, ammo xalqumdan birgina harom luqma o‘tgani aniq bo‘lsa uni tupurib, qusib bo‘lsa ham chiqarib tashlamoq lozim. Harom luqmada yaxshilik yo‘q. Bu aniq!
Ammo tik turib suv ichishlik bu darajada emas. Aks holda tushunarsizlik va adolatsizlik paydo bo‘ladi.
Egan ichganlarimizni halol bo‘lish shartidan keyin sunnatga ko‘ra iste’mol qilsak, sunnatni ado qilganlik savobini olamiz. Faqat sunnatni farz kabi qattiq targ‘ib eta olmaymiz, Farz kabi tushuntirmaymiz. Sunnatga chaqiriladi, unga majbur qilinmaydi, sunnatga rioya qilishlik odamning o‘ziga havola etiladi. 

Suv ichishda bitta farz bor: Suvning halol yo‘l bilan topilgan bo‘lishi. 

Shundayki, Alloh: "Sizga berilgan ne’matlardan albatta so‘ralasizlar"(1)- deb ogohlantirgan.

Suv ichishning sunnatlari:

1. Suvni shoshmasdan, ohista ichishlik. 
Hazrati Ali roziyallohu anhu aytdilar: "Payg‘ambarimiz sollallohu alayhi vasallam:"Suvni emayotgandek iching, og‘zingizga quyib ichmang"(3)  - deganlar. 

2. Suvni bir martada emas, ikki, uch martada ichmoq va ichayotganda ichiga nafas bermaslik lozim.
Abu Qatoda roziyallohu anhu dedilar: Nabiy sollallohu alayhi va sallam buyurdilar: "Sizlardan biringiz suv ichayotganida suv ichayotgan idishiga puflamasin".(4)

Abu Sa’ad roziyallohu anhu aytdilar: Allohning elchisi sollallohu alayhi vasallam dedilar: "Suv idishini og‘zingdan uzoqlashtirganingdan keyin nafas ol". (5)

3. Suvni o‘tirib, o‘tirib ichishga sharoit bo‘lmasa tik turib ichmoqlik. 
Abu Said al-Hudriy roziyallohu anhu Rasulullohning oyoqda tik turib suv ichishdan qaytarganliklarini bildirganlar. (6)
Faqat hazrati Ali roziyallohu anhudan kelgan bir rivoyatda shunday: Hazrati Ali roziyallohu anhu Kufa masjidi eshigida oyoqda tik turib suv ichdi va bunday dedi: "Ba’zilar bir kishining oyoqda tik turib suv ichishini yomon ko‘radilar. Holbuki men Payg‘ambarimiz sollallohu alayhi vasallamning men ichganimni ko‘rganingizdek holda suv ichganini ko‘rdim".(7)

4. Suvni o‘ng qo‘l bilan ichmoq.

Ibn Umar roziyallohu anhu aytdilar: Allohning Elchisi dedilarki: "Biringiz ovqat yeyayotganida o‘ng qo‘l bilan yesin, ichganida ham o‘ng qo‘li bilan ichsin.  Chunki shayton chap qo‘lda yeydi, ichadi".(8)

5. Suv ichishni boshlarkan "Bismillahir rohmanir rohim" deyishlik. Ichib bo‘lgach Allohga hamd aytishlik, ya’ni "Alhamdulillah" demoqlik.

Abu Hurayra roziyallohu anhu uzun bir hadis oxirida shunday debdilar: "Rasululloh sollallohu alayhi vasallam sut kosasini oldi, Bismillah dedi, ichdi va Allohga hamd aytdi".(9)

Umar ibni Salama roziyallohu anhu dedilar:
"Men Rasulullohning tarbiyalarida edim. Taom yeyilayotganida qo‘lim tovoqning har joyida aylanar edi. Allohning rasuli menga "Bolam, Allohning ismini ayt, o‘ng qo‘ling bilan va taomning o‘zingga yaqin bo‘lgan tarafidan yegin!"- deb buyurdi.(10)

6. Suvni ahliga ikrom etmoq: 

Irbad bin Sariyya roziyallohu anhu aytadilar: Rasululloh sollallohu alayhi vasallam dedilar: "Erkak ayoliga suv tutib ham savob oladi".(11)