Sun’iy intellektni tartibga solish uchun alohida xalqaro tuzilma yaratiladimi?

OpenAI rahbari sun’iy intellektni tartibga solish uchun alohida xalqaro tuzilma yaratishni taklif qildi.

Sem Altman Nyu-Dehlida o‘tkazilgan sun’iy intellekt bo‘yicha konferensiyada so‘zga chiqib, tez sur’atlarda rivojlanayotgan ushbu texnologiyani “zudlik bilan” tartibga solish zarurligini ta’kidladi.

Altmanning ogohlantirishicha, ochiq kirish imkoniyatiga ega sun’iy intellekt modellari yangi muammolarni yaratishga yordam berishi mumkin bo‘lgan tizimlarning paydo bo‘lishiga sabab bo‘ladi. Uning fikricha, jamiyat bunday xatarlardan himoyalanish mexanizmlarini oldindan ishlab chiqishi lozim.

"Sun’iy intellektni demokratlashtirish insoniyat farovonligini ta’minlashning eng maqbul yo‘lidir. Mazkur texnologiyaning bitta kompaniya yoki bitta davlat qo‘lida jamlanib qolishi halokatli oqibatlarga olib kelishi mumkin", — dedi Altman.

Uning so‘zlariga ko‘ra, boshqa kuchli texnologiyalarda bo‘lgani kabi, sun’iy intellekt uchun ham aniq himoya choralarini joriy etish zarur. Bu jarayonni muvofiqlashtirish uchun dunyoga Xalqaro atom energiyasi agentligiga o‘xshash tuzilma kerak bo‘lishi mumkin.

Shu bilan birga, ko‘plab tadqiqotchilar va fuqarolik jamiyati faollari neyrotarmoqlar bilan bog‘liq ish o‘rinlarining qisqarishi, jinsiy mazmundagi dipfeyklar va onlayn firibgarlik kabi xavflarga qarshi yanada qat’iy choralar ko‘rish zarurligini ta’kidlamoqda.