Qo‘shma Shtatlardagi musulmonlar Baydenga maktub yo‘lladi

Bir qator amerikalik musulmon nodavlat tashkilotlari AQSh prezidenti Jo Baydenni G‘azo sektoriga nisbatan «AQShning o‘ziga xos siyosatini o‘zgartirish»ga chaqirdi.

Mamlakatning turli hududlarida tashkil etilgan 80 nafar amerikalik musulmon nodavlat tashkiloti vakillari Baydenga maktub yo‘llab, Isroilga yangi qurol sotishni to‘xtatishni talab qildi.

Isroilning G‘azo sektorida mintaqada inqirozga sabab bo‘lgan harakatlari Amerika qonunlariga to‘g‘ri kelmaydi. Bunday harakatlar uchun javob berish kerak, deydi musulmon nodavlat tashkilotlari vakillari.

«Ommaviy platformalarda sizning ma’muriyatingiz Isroilni Rafahga hujum qilishdan qaytarishga harakat qiladi, lekin aslida bu Isroilga Rafahda navbatdagi etnik tozalashni amalga oshirish uchun yashil chiroq yoqadi», deyiladi maktubda.

Musulmon nodavlat tashkilotlari vakillari Vashingtonni AQShning G‘azo bo‘yicha siyosati bo‘yicha aniq qadamlar tashlashga chaqirdi.

«Amerika xalqi ritorikaning o‘zgarishini xohlamaydi, ular siyosatda aniq o‘zgarishlarni talab qiladi», - deyiladi maktubda.

Avvalroq amerikalik musulmon guruhlari vakillari Oq uyda tashkil etilgan iftorga borishdan bosh tortib, Baydenga norozilik bildirgan edi.