Norvegiya Ukrainaga yordamni sezilarli darajada oshirishi mumkin
Ukrainaning eng yirik donorlaridan biri bo‘lgan Norvegiya Kiyevga yordamni sezilarli darajada oshirish imkoniyatini ko‘rib chiqmoqda, deb yozadi AFP.
Norvegiya hukumati 2023–2027 yillarda Kiyevga harbiy va fuqarolik yordami uchun taxminan 75 milliard kron (6,8 milliard dollar) ajratishga va’da berdi.
O‘tgan dam olish kunlari Bosh vazir Yonas Gar Styore bu miqdorni oshirish mumkinligiga ishora qildi, ammo rasmiylar aniq raqamlar haqida hali qaror qilmagan.
Mudofaa va tashqi ishlar vaziri Espen Bart Eyde Osloda bo‘lib o‘tgan brifingda: «Biz hozirgacha qilgan ishlarimizga nisbatan [yordamning] sezilarli o‘sishi haqida gapirayapmiz», dedi. «Hissi shundaki, biz hammamiz ko‘proq ish qilishimiz kerak va hech kim etarli ish qilmagan», deya qo‘shimcha qildi u. «Biz bu strategik jihatdan qanday yakunlanishi haqida realist bo‘lishimiz kerak va Rossiyaning g‘alabasi variant emas.»
Agentlik eslatishicha, Kil universiteti reytingiga ko‘ra, Rossiyaning Ukrainaga bostirib kirishi ortidan energiya narxining oshishidan sezilarli foyda ko‘rgan yirik neft va gaz ishlab chiqaruvchi Norvegiya Kiyevning asosiy homiylaridan biri hisoblanadi.
Espen Bart Eyde o‘tgan hafta Kiyevga tashrifi chog‘ida Norvegiya va Ukraina ikki davlat rahbarlarining navbatdagi uchrashuvida imzolanadigan xavfsizlik shartnomasi bo‘yicha kelishib olganini aytdi.
