Mashhur logotiplar ichida yashiringan 10 sir

Bugungi kunda qayerga qarasangiz, brendlarga ko‘zingiz tushadi. Atrofimizda turli brendlarning o‘ziga xos belgilari, yorliqlari ko‘pki, ular nimani anglatishiga unchalik ahamiyat qaratmaymiz. Biz e’tiboringizga havola etmoqchi bo‘lgan 10 ta logotip o‘z ichiga juda qiziq va g‘ayrioddiy sirlarni olgan.

1. Hyundai

Sizningcha, “H” ko‘rinishidagi logotip Janubiy Koreyaning “Hyundai” avtomobil ishlab chiqaruvchi korxonasi nomining birinchi harfini anglatadimi? Aslida esa bu shaklda ikki insonning bir-biriga qo‘l berib turgani aks ettirilgan. Ularning biri mijoz bo‘lsa, ikkinchisi avtomobil sotuvchisidir va bu tasvir muvaffaqiyatli sotuvning amalga oshirilganini ifodalaydi.

2. Apple

1977 yilda Rob Yanoff zimmasiga “Apple” kompaniyasining logotipini yaratish vazifasi yuklangan edi. Yanoff bir sumka olma sotib olib, hafta davomida ularning eskizini chizishga urindi. Qancha urinmasin, uning chizmalari olchani eslatar edi. Olmaga tishlanganini bildiruvchi shakl qo‘shilganda esa bu muammo hal bo‘lgan. Bundan tashqari, ingliz tilida tishlam so‘zi “bayt” tarzida talaffuz qilinadi. Bu esa ma’lumotlar o‘lchov birligi – bayt so‘ziga o‘xshaydi. Bu so‘z o‘yini Stiv Jobsga ma’qul kelgan.

3. Vaio

Ushbu kompyuter kompaniyasining nomidagi dastlabki ikkita harf raqamli to‘lqin shakliga moslangan. So‘z so‘ngidagi “i” hamda “o” harflari esa ikkilik sanoq sistemasidagi 1 va 0 raqamlari ko‘rinishiga ega. Demak, logotip analog va raqamli tizimlar birlashmasini anglatadi. Shuningdek, mobil aloqa vositasi ishga tushganda jaranglaydigan musiqa – telefon klaviaturasidagi V-A-I-O harflarini bosganda chiqadigan tovushlardan kelib chiqqan.

4. Amazon

Doim mamnunlik belgisini ifodalash uchun “Amazon” brendi o‘zining logotipida tabassumni tasvirlagan. Biroq dizayn faqatgina bu ma’noni anglatmaydi. Bilamizki, ingliz tili alifbosi o‘z ichiga “a” dan “z” gacha bo‘lgan harflarni oladi. Logotipdagi ko‘rsatgich belgisi kompaniya orqali har qanday tovarni topish va buyurtma qilish imkoni mavjudligini bildirish uchun “a” harfidan boshlanib “z” harfida tugaydi.

5. Toyota

T-o-y-o-t-a. Agar sinchiklab qarasangiz, kompaniya nomidagi barcha harflarni logotipdan topish mumkin. Ammo bu ko‘rinish nimani anglatadi? Balki shlyapa kiygan kovboy yoki buqa tasvirlangan deb o‘ylayotgandirsiz. Bunday emas! Bu belgi aslida igna va ipni anglatadi. Negaki, ushbu yapon avtomobillarini ishlab chiqaruvchi korxona o‘z ishini to‘quv dastgohlari yasashdan boshlagan va shu kungacha o‘z logotipini o‘zgartirmay saqlab kelmoqda.

6. Continental

Bir qarashda juda sodda ko‘ringan ushbu logotip ham aslida o‘z ma’nosiga ega. Dastlabki ikkita harf avtomobil shinalari ko‘rinishida dizayn qilingan.

7. Toblerone

Ushbu mashhur shokoladning yorlig‘idagi tasvir oddiygina tog‘ ko‘rinishini ifodalamaydi. “Toblerone” Bernda (Shveysariya) ishlab chiqarilgan. Shu tufayli Shveysariyadagi Alp tog‘larining tasvirlanishi hayratlanarli emas. Bern ayiqlar shahri sifatida tanilgan va butun shahar ayiq ramzi bilan bezatilgan. Tog‘ tasviridan ham berkitilgan ayiqni topish mumkin.

8. BMW

Nemis avtoulovlari kompaniyasi 1916 yilda samolyotlar ishlab chiqarishni boshlagan. Ko‘pchilik logotipdagi shakl samolyotning aylantiruvchi vintlarini aks ettiradi deb o‘ylashadi. Lekin bu aslida kompaniya paydo bo‘lgan joy – Bavariya bayrog‘ining dizaynini ifodalaydi.

9. Domino pissalari

1960 yil kollejni tamomlagan Tom Monagan “Dominic” deb nomlangan joyda ijaraga pissa savdosini yo‘lga qo‘yish uchun 900 dollar qarz olgan. 5 yildan so‘ng yana ikkita joyni sotib oladi. Bu paytgacha ancha mashhurlikka erishgan joyning asl egasi “Dominic” nomining doimiy foydalanilishiga ruxsat bermaydi. Shuning uchun Tom uni “Domino”ga aylantiradi. Logotipdagi bitta nuqta u sotib olgan birinchi restoranni, ikkita nuqta esa keyinroq sotib olingan yana ikkita restoranni anglatadi. Tom Monagan har yangi joy ochilganda bittadan nuqtalar sonini oshirib borishni rejalashtirgan. Biroq bu paytda u pissalar tarmog‘ining qanchalik katta bo‘lib ketishini bilmagandi.

10. Unilever

“Unilever” – 400 dan ortiq taniqli brendlarni o‘zida birlashtirgan ulkan korporasiya. Korporasiyaga qarashli mahsulotlar yorlig‘ida logotipni topish mumkin. Masalan, “Ax” dezodaranti, “Lipton” choyi, “Ben va Jerri” muzqaymog‘i, “Dove” shokoladi va boshqalar. Korporasiya logotipi 25 ta kichik logotiplarni o‘zida jamlagan bo‘lib, ularning har biri chuqur ma’noni anglatadi. Belgilar korporasiyaga qarashli brendlarni ifodalaydi. Masalan, logotipdan muzqaymoq, asalari kabi ramziy ifodalarni topish mumkin.