Ixcham magnitli kompyuter yaratildi

“LETI” Sankt-Peterburg davlat elektrotexnika universiteti mutaxassislari yangi fizikaviy prinsiplarga asoslangan ixcham kompyuterni yaratdilar. Analoglaridan farqli o‘laroq, magnonikaga asoslangan yangi rezervuar kompyuteri kaftingizga sig‘adi va taxminan 10 barobar kamroq energiya sarflaydi, dedi LETI fizikaviy elektronika va texnologiya kafedrasi professori Aleksey Ustinov TASSga. Bu haqda Kazinform agentligi xabar beradi.

- Bizning ishlanmamiz rezervuar kompyuterining dizaynini soddalashtirish, uni yengilroq, energiya tejamkorligi va kaftingizga sig‘adigan darajada ixcham qilish imkonini berdi. Ana shu xususiyatlardan kelib chiqib, kelajakda bunday hisoblash qurilmalari texnologiyada, masalan, boshqaruvchisiz suv osti, yer va havo transport vositalarining elektron tizimlari og‘irligini kamaytirish uchun keng tarqalishi mumkin, — dedi A.Ustinov.

Professor zamonaviy raqamli qurilmalarning aksariyati o‘z imkoniyatlari chegarasiga yaqinlashib qolgan klassik elektronika tamoyillari asosida ishlayotganini tushuntirdi. Cheklovlarni yengishning bir yo‘li - bu magnonik prinsiplarga asoslangan kompyuterlarni ishlab chiqishdir. Ushbu ilmiy yo‘nalishning markazida spin to‘lqinlari (magnitlanish to‘lqinlari) va magnon kvazizarralari joylashgan.

- Nisbatan yaqinda olimlar, jumladan, biz magnonlar yordamida tranzistorli hisoblash qurilmalariga nisbatan yuqori tezlik va kam quvvat sarfi bilan tanib olish va tasniflash masalalarini yechish mumkinligini isbotladilar. Magnon fizik rezervuari neyron tarmog‘ining apparat analogi bo‘lib, u an’anaviy dasturiy ta’minot neyron tarmoqlari bilan bir xil funksionallikka ega, - deya qo‘shimcha qildi Aleksey Ustinov.

Rezervuar kompyuteri neyron tarmoq operasiyalarini bajarish uchun, masalan, ob’ektlarni aniqlash, fazoviy yo‘naltirish va korxonalarda axborot tizimlarini avtomatlashtirish uchun mo‘ljallangan. U magnit plyonkaga asoslangan. Maxsus plyonkaning turli bo‘limlariga elektr toki beriladi, bu esa dastlab bir xil magnitlanish maydonini mahalliy ravishda o‘zgartiradi. Shunday qilib, bitlar bilan kodlangan turli amplitudali axborot signallari kompyuter rezervuariga uzatiladi.