Evropa Ukraina havo va dengiz hududini nazorat qilishga tayyorlanmoqda!

Evropa Ukrainaga yuborish uchun aviasiya va harbiy-dengiz kuchlarini tayyorlamoqda.

The Washington Post manbalariga ko‘ra, Yevropa Ukrainani nazorat qilish uchun aviasiya va harbiy-dengiz kuchlarini yuborish imkoniyatini ko‘rib chiqmoqda.

Nashr xabar berishicha, tinchlikparvarlik missiyasini muhokama qilish jarayonida Yevropa mamlakatlarining e’tibori yirik quruqlik qo‘shinlarini joylashtirish qiyinchiliklari tufayli havo va dengiz kuchlaridan foydalanishga qaratilgan. Xususan, Ukraina havo hududi va Qora dengizni nazorat qilish bo‘yicha takliflar ko‘rib chiqilmoqda.

Bundan tashqari, ba’zi davlatlar Rossiya tomonidan tahdid bo‘lgan taqdirda AQShning aralashuvi kafolatlari bo‘lmasa, o‘z kuchlarini joylashtirishdan voz kechdi. Yevropa amaldorlari Vashingtonning yordamiga, jumladan, havo hujumidan mudofaa, razvedka va havo transporti bo‘yicha qo‘llab-quvvatlashiga umid bog‘lamoqda.

"Istak bildirganlar koalisiyasi"ning Parijdagi sammiti 27 mart kuni bo‘lib o‘tdi. Unda 31 davlat, shuningdek, Yevropa Ittifoqi va NATO vakillari ishtirok etdi.

Ushbu uchrashuv yakuniga ko‘ra, Kiyevga harbiy, moliyaviy va energetik yordam kuchaytirilishi, shuningdek, Rossiyaga qarshi mudofaa urushini olib borayotgan mamlakatni tiklashda ko‘maklashish e’lon qilindi.

Sammit ishtirokchilari Ukrainaga qo‘shimcha 17 milliard yevrolik harbiy yordam ajratish, Kiyevga 2 million dona artilleriya o‘q-dorisini yetkazib berish va Yevropa Ittifoqiga a’zo davlatlar tomonidan ko‘rsatilayotgan yordam Ukraina ehtiyojlariga mos kelishi uchun ular o‘rtasidagi hamkorlikni yaxshilash majburiyatini oldilar.

Bundan tashqari, Yevropa rahbarlari Ukraina mudofaa sanoati bilan hamkorlikni kuchaytirish va Ukraina askarlarini harbiy tayyorlash bo‘yicha Yevropa Ittifoqi missiyasini rivojlantirishni davom ettirish to‘g‘risida kelishib oldilar.