Toshkent shahar hokimligining Yuridik boshqarmasi yuristkonsulti 70 ming AQSh dollari pora olayotganida qo‘lga tushdi

Toshkent shahar hokimligining Yuridik boshqarmasi yuristkonsulti chet el fuqarosiga tegishli bo‘lgan ko‘chmas mulk davlat ehtiyojlari uchun buzilganligi sababli, kompensasiya sifatida sud qarori bilan davlat tomonidan ajratilishi belgilab qo‘yilgan 8,8 mlrd. so‘mni tezlashtirib olib berish evaziga, o‘zining 1979 y.t. tanishi orqali mazkur pul mablag‘ining 10 foizini, ya’ni 70 ming AQSh dollari talab qilgan.
Aks holda, sud qarori yuzasidan Toshkent shahar hokimligi nomidan kassasiya shikoyati berib, ko‘chmas mulkni qayta baholash yo‘li bilan, belgilangan kompensasiya miqdorini kamaytirishi mumkinligini aytgan.
DXX hamda IJQKD xodimlari hamkorligida o‘tkazilgan tezkor tadbirda, vositachi xorijiy fuqarodan 70 ming AQSh dollarini olgan vaqtida ashyoviy dalillar bilan ushlandi.
So‘rov suhbati davomida, u bir muddat avval yuristkonsultga o‘z hisobidan 50 ming AQSh dollari berib qo‘yganligini aytib, yana 15 ming AQSh dollarini yuristkonsultga olib borib berishini, qolgan 5 ming AQSh dollarini esa o‘zining vositachilik xizmati uchun olib qolishni rejalashtirganligini ma’lum qildi.
So‘ngra tezkor tadbir davom ettirilib, yuristkonsult 15 ming AQSh dollarini olgan vaqtida ushlandi.
Shuningdek, yuristkonsult muqaddam o‘zining vositachisidan olgan 50 ming AQSh dollaridan 10 ming AQSh dollarini kompensasiya mablag‘ining o‘tkazilish jarayonini tezlashtirib berishi uchun Toshkent shahar Iqtisodiyot va moliya bosh boshqarmasining bosh mutaxassisiga berganligi ma’lum bo‘ldi.
Yuriskonsult ko‘rsatmasi asosida bosh mutaxasiss prosessual tartibda ushlandi hamda yuristkonsult 40 ming AQSh dollarini, bosh mutaxassis esa 10 ming AQSh dollarini ixtiyoriy ravishda taqdim qildi.

“Hududgaz Surxondaryo” gaz ta’minoti filialining Termiz shahar bo‘limi Gaz ta’minoti ob’ektlarini texnik tiklash va ishlatish xizmati boshlig‘i Koson tumanida yashovchi fuqaro yuk avtomashinasini boshqarib ketayotib, avtotransport vositasining tom qismi bilan tabiiy gaz quvuriga shikast yetkazgani holati yuzasidan tuzilgan dalolatnomani yo‘q qilish hamda 11 mln. so‘m miqdorida jarimaga tortmaslik evaziga, undan 400 AQSh dollari va 500 ming so‘m talab qilib, 3 mln. 900 ming so‘m va 100 AQSh dollari olgan vaqtida ashyoviy dalillar bilan ushlandi. Tergovga qadar tekshiruv davomida, u avvalroq 500 ming so‘m olganligi ham ma’lum bo‘ldi.

Kadastr agentligining Jizzax viloyati Zomin tumani bo‘limi yetakchi inspektori 1997 y.t. fuqaro o‘zboshimchalik bilan egallab olgan yer uchastkasida qurilish ishlarini amalga oshirganligi holati yuzasidan qo‘llanilgan 75 mln. so‘m miqdoridagi jarimani tanishlari orqali kamaytirib, noqonuniy qurilgan turar-joy binosining hujjatlarini rasmiylashtirib berish evaziga 400 AQSh dollari olgan vaqtida ushlandi.

Davlat kadastrlar palatasining Qashqadaryo viloyati Koson tumani bo‘limi kadastr muhandisi o‘z xizmat mavqeidan foydalangan holda mahalliy fermer xo‘jalik rahbari bilan til biriktirib, mansabdor tanishlari orqali mazkur fermer xo‘jalikning 2 gektar suvli yer maydonini 60 mln. so‘mga hamda tegishli hujjatlari bo‘lmagan 35 sotix yer maydonini turar-joy toifasiga o‘zgartirib, keyinchalik egalik huquqini beruvchi hujjatni rasmiylashtirib berish evaziga 525 mln. so‘m, jami xaridordan 585 mln. so‘m talab qilib, oldindan 17 ming AQSh dollari olgan vaqtlarida ushlandi.

Majburiy ijro byurosining Qarshi shahar bo‘limi davlat ijrochisi jinoyat oqibatida yetkazilgan zararni undirish to‘g‘risidagi ijro ishi yuzasidan jabrlanuvchi fuqaroga qaytarilishi lozim bo‘lgan 554 mln. so‘mni uning plastik kartasiga o‘tkazib berish evaziga muqaddam 2 mln. so‘m va 100 AQSh dollari olib, qo‘shimcha 2 mln. so‘m olgan vaqtida ushlandi.

“Hududiy elektr tarmoqlari” AJga qarashli “Energosavdo” korxonasining Sirdaryo viloyati Xovos tumani bo‘linmasi inspektori mahalliy fermer xo‘jalik tomonidan elektr energiyasiga noqonuniy ulanish natijasida davlat manfaatlariga 14 mln. so‘m miqdorida yetkazilgan zararni yo‘q qilib, xo‘jalikni tarmoqqa qayta ulab berish evaziga 7 mln. so‘m olgan vaqtida ashyoviy dalillar bilan ushlandi.

Hozirda barcha holatlar yuzasidan jinoyat ishlari qo‘zg‘atilib, tergov harakatlari olib borilmoqda.