Evroittifoq yetakchilari Trampni Rossiyaga qarshi sanksiyalarni kuchaytirishga chaqirdi

Ularning fikricha, Rossiya faqat qattiq bosim ostida talablarni bajaradi va sanksiyalarni kuchaytirish muzokaralarda hal qiluvchi ahamiyatga ega bo‘ladi.

Financial Times nashrining yozishicha, Yevropa mamlakatlari va Ukraina vakillari ishtirokida o‘tgan yakshanba kungi muzokaralarda, shuningdek, AQSh vise-prezidenti Jey Di Vens qatnashgan yig‘ilishda Vashingtonga Rossiyaga qo‘shimcha sanksiyalar tahdidini ishga solish taklif qilindi. Germaniya kansleri Fridrix Mersning so‘zlariga ko‘ra, birgina harbiy bosim yetarli emas va AQShning kuchli iqtisodiy sanksiyalari Rossiya iqtisodiyotiga jiddiy zarba berishi mumkin.

Evropa rasmiylari ehtimoliy otashkesim shartnomasi har qanday buzilish holatida qattiq iqtisodiy choralar bilan ta’minlanishi kerakligini ta’kidladi. Bu Rossiyaga tinchlikdan iqtisodiy foyda olib, keyin urushni qayta boshlash imkoniyatini bermasligi lozim.

Evropada bosim vositalaridan biri sifatida muzlatilgan Rossiya zaxiralari ham ko‘rib chiqilmoqda. YEI manbalariga ko‘ra, agar Moskva Ukrainaga yetkazgan zararni qoplamasa, ushbu aktivlar taqdiri bo‘yicha bahs boshlanishi mumkin.

Mers yakshanba kuni Tramp bilan uning Putin bilan Alyaskadagi uchrashuvi oldidan gaplashishi kerak edi. Bloomberg nashrining yozishicha, boshqa Yevropa yetakchilari ham AQSh prezidenti bilan bu masalani muhokama qilish niyatida.

London Qirollik kolleji professori, Rossiya siyosati bo‘yicha mutaxassis Sem Grin fikricha, bu uchrashuv ham Putin, ham Trampning o‘ziga bosim ostida qolgan holatidan kelib chiqqan. Putin belgilangan muddatda tinchlik tashabbusini e’lon qilishni rejalashtirmagan, chunki bu uning zaiflikka moyilligini ko‘rsatishi mumkin edi. Shu bilan birga, Tramp sanksiyalarni joriy etish natijasi zaif bo‘lishidan xavotirda, chunki bunday holda u ikki karra zaif ko‘rinishi mumkin.