DTM rasmiy izoh berdi: Abituriyentlar davlat test markaziga ariza bilan murojaat qilsa, ularning to‘lovlari qaytariladi

O‘zbekistonda 2019/2020-o‘quv yili qabuli test sinovlarida ishtirok etish uchun ariza bergan abituriyentlardan 896,4 million so‘m ortiqcha to‘lov undirilgani haqida xabar berilgan edi. DTM matbuot xizmati bunga izoh berdi.

Ma’lum qilinishicha, Prezidentning 2019 yil 14 maydagi qaroriga asosan, test sinovlari tashkil etilayotgan o‘quv yilidan avvalgi yillarda ta’lim muassasalarini tugatgan abituriyentlardan (nogironligi bo‘lgan yoki to‘liq davlat ta’minotidagi shaxslar bundan mustasno) test sinovlarida ishtirok etishi uchun eng kam ish haqining yarim baravari miqdorida to‘lov undirilishi joriy etilgan.

2019/2020-o‘quv yili qabulida oldingi yillar bitiruvchilaridan test sinovi uchun to‘lov undirish birinchi marta joriy etilgan bo‘lib, mazkur yilda abituriyentlardan hujjatlar qabuli oliy ta’lim muassasalari qabul komissiyalari va Davlat xizmatlari markazlari orqali amalga oshirilgan. Unda abituriyentlar hujjatlarini topshirish uchun OTMlar qabul komissiyalari yoki Davlat xizmatlari markazlariga murojaat qilganda ular tomonidan to‘lovni amalga oshiradigan toifadagi abituriyentlarga to‘lovni amalga oshirish uchun kvitansiya shakllantirib berilgan va abituriyentlar to‘lovni amalga oshirgandan so‘ng hujjatlarini topshirgan.

«To‘lov undirilmaydigan toifadagi abituriyentlarning hujjatlari esa shu zahoti qabul qilingan. Bunda to‘lovni amalga oshirmaydigan abituriyentlar toifalari haqidagi ma’lumotlar DTM tomonidan oliy ta’lim muassasalar qabul komissiyalari va Davlat xizmatlari markazlariga yetkazilgan hamda Davlat test markazining Telegram’dagi rasmiy kanalida e’lon qilingan.

Shunday bo‘lsa-da, to‘lovni amalga oshirmaydigan abituriyentlar tomonidan hujjatlarni topshirish jarayonida test sinovi uchun to‘lovni amalga oshirish holatlari kuzatilgan. Buning natijasida 896,4 million so‘m ortiqcha to‘lov amalga oshirilgan», — deyiladi DTM izohida.

Qayd etilishicha, o‘tgan davr mobaynida abituriyentlarning arizasiga asosan ortiqcha to‘langan 156,3 million so‘m egalariga qaytarilgan. 2021 yilning 25 martida ortiqcha to‘langan mablag‘ miqdori 740,1 million so‘mni tashkil etgan. Qolgan abituriyentlar to‘lovni qaytarish bo‘yicha ariza bilan murojaat qilmaganliklari sababli Davlat test markazida ularning to‘lovlarini qaytarish imkoni bo‘lmagan.

Shunday bo‘lsa-da, ularning ma’lumotlari tahlil qilinib, noto‘g‘ri to‘lov amalga oshirgan 3 170 nafar abituriyentning ma’lumotlari 2020 yil uchun ro‘yxatdan o‘tgan abituriyentlar bazasidan aniqlanib, telefon raqamlariga SMS xabarnomalar yuborilgan. Qolgan 4132 nafar abituriyentning ma’lumotlariga esa ayni paytda aniqlik kiritib bo‘lmayapti.

«2019 yilning tajribasidan kelib chiqqan holda abituriyentlarni ro‘yxatga olish uchun ishlatiladigan ABITUR dasturi takomillashtirilib, mazkur kamchilikning oldini olish maqsadida dastlab abituriyentlar onlayn ro‘yxatga olindi va dastur tomonidan test sinovi uchun to‘lovni amalga oshirishi kerak bo‘lgan abituriyentlar aniqlanib, ularga invoys shakllantirildi. To‘lovni amalga oshirmaydigan abituriyentlar uchun esa invoys shakllantirilmadi va ularning arizasi to‘g‘ridan-to‘g‘ri qabul qilindi. Buning natijasida to‘lovni amalga oshirish bilan bog‘liq kamchiliklar bartaraf etildi», — deyiladi xabarda.

DTM abituriyentlar tomonidan noto‘g‘ri amalga oshirilgan to‘lovlarning abituriyentlarga to‘liq holda qaytarilishi tarafdori ekanini ta’kidlab, mazkur abituriyentlar Davlat test markaziga ariza bilan murojaat qilganda, ularning to‘lovlari qaytarilishini bildirgan.