Britaniya Ukrainaga qo‘shin yuborish rejasidan qaytdi

Buyuk Britaniya Ukrainaga muhim tinchlikparvar kuchlarini joylashtirish rejalarini qisqartirdi, deb yozadi The Times.

Gazetaga ko‘ra, Britaniya harbiy qo‘mondonligi 30 ming kishilik kontingentni yuborish g‘oyasidan voz kechgan. Buning o‘rniga havo xavfsizligini ta’minlash, Ukraina qo‘shinlarini tayyorlashni qo‘llab-quvvatlash va Qora dengizni minalardan tozalash kabi “realistik missiya” taklif qilinmoqda.

13 avgust kuni AQSh prezidenti Donald Tramp va Yevropa Ittifoqi yetakchilari bilan videokonferensiya orqali suhbatdan so‘ng Buyuk Britaniya bosh vaziri Kir Starmer Buyuk Britaniya va Yevropa davlatlari o‘t ochishni to‘xtatish to‘g‘risidagi kelishuvga erishilgandan so‘ng Ukrainaga “qo‘llab-quvvatlovchi kuchlarni” joylashtirish bo‘yicha oqilona harbiy rejalari borligini aytdi, deb yozadi gazeta.

Starmerning so‘zlariga ko‘ra, Trampning sa’y-harakatlari tufayli Ukrainada uch yarim yillik urushdan so‘ng o‘t ochishni to‘xtatishga erishish imkoniyati mavjud.