Argentina terma jamoasi futbolchisi JCH-2022'ga borish uchun sehrgarga murojaat qilgan

Papu Gomes jahon chempionatiga borish uchun sehrgarga murojaat qilgan.

Bu haqda ESPN telekanalining sobiq jurnalisti Gonsalo Kardoso gapirib berdi.

Unga ko‘ra, "Sevilya" yarim himoyachisi Jovani Lo Chelsoning jarohatidan tiklanishini sekinlashtirish uchun jodugarga murojaat qilgan. Gomes bu unga terma jamoa qaydnomasidan joy olishga yordam berishiga ishongan.

Gomes Argentina terma jamoasi safida JCH-2022 qaydnomasiga kirdi va turnirda 2 ta o‘yin o‘tkazdi.

Kardoso Argentina terma jamoasi futbolchining jodugar xizmatidan foydalanganidan xabar topganini va shuning uchun u Panama va Kyurasaoga qarshi bo‘lib o‘tadigan o‘rtoqlik uchrashuvlari uchun tarkibdan olib tashlanganini aytdi.

Futbolchining o‘zi ijtimoiy tarmoqlarda jamoadan chetlatilganiga jarohat sabab bo‘lganini aytdi.