Зеленский ҳарбий сафарбарлик тўғрисидаги қонунни имзолади
Украина президенти Владимир Зеленский Украинанинг айрим қонун ҳужжатларига ҳарбий хизмат, сафарбарлик ва ҳарбий рўйхатга олишнинг айрим масалалари бўйича ўзгартиришлар киритиш ҳақидаги қонунни имзолади. Тегишли ҳужжат 16 апрель куни Украина парламенти сайтида эълон қилинди.
Қонунга кўра, сафарбарлик чоғида 18 ёшдан 60 ёшгача бўлган эркаклар ўзлари билан ҳар доим ҳарбий рўйхатга олинганлик тўғрисидаги ҳужжатни олиб юришлари ва уни ҳудудий қабул қилиш маркази вакилининг илтимосига биноан тақдим этишлари шарт.
Қонун эълон қилинганидан кейин ҳарбий хизматни ўташга мажбур бўлган барча шахсларга 60 кун ичида амалдаги яшаш манзили, алоқа маълумотлари ва бошқа ҳарбий рўйхатга олиш маълумотларига аниқлик киритилиши шарт.
Мобилизация тўғрисидаги қонун лойиҳаси Олий Радага икки марта киритилган. Ҳукумат уни илк бор парламентга декабрь ойида юборган, бироқ жамоатчилик норозилигидан кейин ҳужжат қайта кўриб чиқиш учун юборилган. Қонун лойиҳасининг янги таҳрири Олий Радага январь ойи бошида киритилган, 7 февралда эса биринчи ўқишда маъқулланган эди. Ҳужжатни ёқлаб 450 нафар депутатдан 283 нафари овоз берган.
Мазкур қонун лойиҳасидан ҳарбий ҳолат шароитида 36 ой хизмат қилган ҳарбий хизматчиларни демобилизация қилиш тўғрисидаги низом армия бош қўмондони Александр Сирскийнинг талаби билан олиб ташланган. AFP’нинг қайд этишича, бу фронтдаги кўплаб украиналик аскарларнинг норозилигига сабаб бўлган.
