Япония Россияга қарши санкцияларни кенгайтирди ва яна 25 нафар россияликни "қора рўйхат"га киритди

Япония Украинадаги вазият ва давом этаётган ҳарбий амалиёт туфайли Россияга қарши санкцияларни кенгайтирди.

Шунингдек, Япония 25 нафар россиялик ва Россиянинг 81 ташкилотига қарши янги санкциялар пакетини жорий қилмоқда. Бу ҳақда Япония Ташқи ишлар вазирлиги маълум қилди.

Хабарда айтилишича, рўйхатга Россия Федерацияси Президентининг Матбуот котиби Дмитрий Песков ва унинг рафиқаси Татьяна Навканинг катта фарзандлари, ВЭБ давлат корпорацияси раиси Игорь Шувалов ва унинг қариндошлари, “Северстал”нинг асосий акциядори Алексей Мордашов, “Ростех” бош директори Сергей Чемезовнинг қариндошлари, Россия Президенти маъмурияти раҳбарининг биринчи ўринбосари Сергей Кириенко, Россия Федерацияси Хавфсизлик кенгаши котиби Николай Патрушев, Россия Федерацияси Президентининг атроф-муҳитни муҳофаза қилиш, экология ва транспорт бўйича махсус вакили Сергей Ивановнинг ўғли, “Россия” банкининг эгаси Николай Шамалов ва унинг ўғли Кирилл, “Роснефть” раҳбари Игорь Сечиннинг ўғли Иван, “Транснефть” президенти Николай Токаревнинг қариндошлари ва тадбиркор Ротенберглар киритилган.

Санкция киритилган компаниялар орасида Миасс автомобиль заводи, “Вимпел” кемасозлик заводи, Амур кемасозлик заводи, Ярослав кемасозлик заводи, “Красное Сормово” заводи, “Звёздочка” кемасозлик заводи ва бошқалар бор.

Бундан ташқари, Япония ҳашаматли товарларни Россияга экспорт қилишни тақиқлади.